Allohshukur Poshozoda
Kavkaz musulmonlari diniy idorasi raisi, muftiy shayxul-Islom Allohshukur Poshozoda 1949 yil 26 avgustida Ozarbayjonning Lenkoran tumani Jil qishlog‘ida tavallud topgan.
Allohshukur Poshozoda maktabni tamomlagach, 1968 yili 19 yoshida Buxorodagi Mir Arab madrasasiga o‘qishga keladi. Madrasani tugatib, Imom Buxoriy nomidagi Islom institutiga o‘qishga kiradi. Oliygohni 1975 yilda tugatib, shu yilning o‘zida Kavkaz musulmonlari idorasiga mas’ul kotib va rais o‘rinbosari qilib ishga olinadi. 1979 yilning yozida Kavkaz musulmonlari diniy idorasining raisi etib saylanadi va shayx ul-islom maqomiga ega bo‘ladi.
Allohshukur Poshozoda 1985 yildan Iordaniya qirolligi akademiyasining, 1988 yildan Umumjahon Islom kongressi maslahatchilarining a’zosidir. U 1992 yilda Ozarbayjon, Gruziya, Dog‘iston, Ingushetiya, Checheniston davlati diniy arboblari tomonidan Kavkaz xalqining yuqori diniy maslahatchi raisi etib saylangan. Shuningdek, 2004 yildan BMTning Xalqaro diniy maslahatchi raisi sifatida faoliyat ko‘rsatmoqda.
O‘zbekiston musulmonlari idorasi
Matbuot xizmati
Turkiy davlatlar muftiylari 10 ga yaqin muhim bayonot va fatvolarni imzoladilar
Xabar berganimizdek, Ozarbayjon poytaxti Boku shahrida Turkiy davlatlar muftiylari kengashining navbatdagi VII yig‘ilishi bo‘lib o‘tdi.
Yig‘ilish yakunida O‘zbekiston, Turkiya, Ozarbayjon, Qozog‘iston va Qirg‘iziston muftiylari muhim yo‘nalishlarda 3 ta bayonot va zamonaviy masalalarga oid 6 ta yirik fatvoni imzolashdi.
Jumladan, «Islomning ilm-fan va texnologiyaga yondashuvi» mavzusidagi bayonotda Islom dinida insoniyat farovonligiga xizmat qiluvchi barcha ilmiy va texnologik yutuqlar qo‘llab-quvvatlanishi bilan birga, ular yuksak axloqiy mezonlar, adolat va mas’uliyat tamoyillari asosida rivojlanishi shartligi ta’kidlandi.
«Musulmonligi ma’lum bo‘lgan shaxsni kofirga chiqarishning hukmi» to‘g‘risidagi bayonotda Islom ta’limotiga ko‘ra, kalimai shahodat keltirib, qibla ahlidan bo‘lgan har qanday shaxs musulmon hisoblanishi hamda qilgan gunohi yoki amaldagi nuqsoni tufayli uni kufrda ayblash (takfir qilish) qat’iyan man etilishi aytildi. Shuningdek, Turkiy davlatlar ulamolari ushbu bayonotda jamiyatda fitna, qon to‘kilishi va nizolarga sabab bo‘luvchi takfirchilik oqimlariga qarshi ilmiy-ma’rifiy kurashni kuchaytirish, ummat birdamligini mustahkamlash zarurligiga e’tibor qaratishdi.
«Oila qurishga targ‘ib qilish, uni muhofaza qilish va mustahkamlashga doir umumiy mas’uliyat» bayonotida Islom ta’limotiga ko‘ra, oila nikoh asosiga quriladigan, sog‘lom avlod va jamiyat davomiyligini ta’minlovchi, insonga ruhiy xotirjamlik hamda axloqiy tarbiya beruvchi muqaddas muassasa ekaniga urg‘u qaratildi. Muftiylar oila institutini himoya qilish, yoshlarni oilaga tayyorlash va milliy-ma’naviy qadriyatlarni mustahkamlashda birdamlikka chaqirdilar.
Shuningdek, muftiylar tomonidan «Bitta qabrga birdan ortiq mayyitni dafn etishning hukmi», «Ijaraga berilgan dehqonchilik yerlarining ushri», «Fatvo so‘rash va fatvo berishda sun’iy idrokdan foydalanish masalasi», «Juma namozi durust bo‘lishining shartlari», hijriy oy boshlanishini aniqlash mezonlari va takfir masalasiga doir 6 ta fatvo matni imzolandi.
O‘zbekiston musulmonlari idorasi Matbuot xizmati
