Naurizbay Utpenov
Oʻzbekiston Prezidenti Shavkat Mirziyoyev tashabbusi bilan boʻlib oʻtayotgan bu muhtasham anjuman, nafaqat musulmonlar uchun, balki ular bilan diniy bagʻrikenglik tamoyillari asosida umrguzaronlik qilib kelayotgan, qoʻni-qoʻshnichilik munosabatlarini olib borayotganlar uchun ham xayrlidir.
Islom barcha xalqlarni birlikka chorlaydi. Islom diniga eʼtiqod qiluvchi barcha moʻminlar orasida tarqalgan salom soʻzi ham “Sizga tinchlik, omonlik tilayman”, degandir. Shu maʼnoda, islom nomi bilan bogʻlanayotgan xunrezliklar va noxush hodisalar zamirida chin islomga xos boʻlgan eʼtiqod yoʻq, desak, aslo yanglishmagan boʻlamiz.
Ota-bobolarimiz minglab yillar mobaynida islom diniga eʼtiqod qilib keladi. Bu ezgu din, Markaziy osiyoda yashayotgan xalqlarning urf-odatlariga qadar singib ketgan va bunda hech qanday gʻalizlik kuzatilmaydi.
Bunga sabab esa, sof islom aqidasini, uning maʼrifatini, insonparvarligiyu ezgu gʻoyalarini botil aqidalardan oriflik bilan ajratib bera olgan ulamolarning aynan Markaziy osiyodan koʻplab yetishib chiqqanidir. Bu ezgu taʼlimotlardan uzoqlashgan sari, fitnalar koʻpayigani bor gap. Shu bois, ota-bobolarimizning toʻgʻri eʼtiqod borasidagi tavisiyalari va ilmiy merosiga suyanishimiz shart.
Bugun axborot globallashuvi tufayli botil gʻoyalar bilan chalgʻiyotgan yoshlar kam emas. Shu bois, ularga eʼtiqod nuqtai-nazaridan toʻgʻri maʼlumot berish, yoshlarni botil aqidalardan oʻz vaqtida ogoh qilib borish, biz ulamolarning vazifamizdir. Alloh taolo oʻz kalomida “Agar bilmaydigan boʻlsangiz, zikr ahllaridan soʻrangiz”, deb marhamat qiladi. Allohga shukurki, Oʻrta osiyo xalqi, islom olamiga tanilgan allomalari bilan faxrlanadi. Muqaddas kalomdagi “bilganlar” ham shular, aslida.
Imom Buxoriy, Imom Termiziy, Xoja ahmad Yassaviy, Sigʻnoqiy kabi allomalar haqni botildan ajratgan, ummatga toʻgʻri yoʻlni va islom maʼrifatini koʻrsatib bergan kishilar edi. Mana shunday ajdodlarimizning moʻtadil yoʻli esa, yoshlarni radikal gʻoyalardan asrashda juda muhim. Bugungi anjuman aynan shu haqiqatni anglatishga xizmat qilmoqda.
Naurizbay Utpenov,
Qozogʻiston musulmonlari diniy boshqarmasi raisi, bosh muftiy
Xalq qabulxonasi vakillari ishtirokida amaliy seminar bo‘lib o‘tdi
O‘zbekiston musulmonlari idorasida aholi bilan muloqot tizimini takomillashtirish va murojaatlar bilan ishlash samaradorligini oshirishga qaratilgan amaliy seminar-trening bo‘lib o‘tdi. Unda mazkur yo‘nalishga mas’ul bo‘lgan mutaxassislar bevosita hamda masofaviy tarzda ishtirok etdi.
Tadbirni O‘zbekiston musulmonlari idorasi raisining birinchi o‘rinbosari Homidjon domla Ishmatbekov kirish so‘zi bilan ochib, fuqarolarning murojaatlariga yuksak hurmat bilan qarash va ularning dardiga oqilona yechim topish har bir rahbar hamda xodimning nafaqat vazifasi, balki oliy insoniy burchi ekanini alohida ta’kidladi.
Seminarda O‘zbekiston Respublikasi Prezidenti Xalq qabulxonasining mas’ul vakillari – Davlat tashkilotlari tomonidan murojaatlar ko‘rib chiqilishini nazorat qilish sho‘basi bosh inspektori Saidakmal Xodjayev hamda sho‘ba yetakchi inspektori Rashid Kurganov ishtirok etib, tizimdagi holatni qonunchilik talablari asosida atroflicha tahlil qilib berdilar.
Soha mas’ul mutaxassislari tomonidan ayni yo‘nalishdagi Prezident Farmoni ijrosi doirasida murojaatlarni ko‘rib chiqishda qonuniylik va tezkorlikni ta’minlash, jarayon shaffofligini oshirish hamda murojaatlarni nazoratdan olishning mexanizmlarini to‘g‘ri qo‘llash bo‘yicha muhim tavsiyalar berildi.
Ochiq muloqot ruhida o‘tgan mazkur tadbir tizim xodimlarining murojaatlar bilan ishlash madaniyati va huquqiy savodxonligini yanada oshirishga xizmat qiladi. Amaliy tahlillarga boy bo‘lgan ushbu seminar fuqarolarning huquq va qonuniy manfaatlarini to‘laqonli himoya qilish hamda xalqimizning diniy-ma’rifiy sohaga bo‘lgan ishonchini mustahkamlash yo‘lidagi muhim va tizimli qadam bo‘ldi.
O‘zbekiston musulmonlari idorasi
Matbuot xizmati
