Naurizbay Utpenov
Oʻzbekiston Prezidenti Shavkat Mirziyoyev tashabbusi bilan boʻlib oʻtayotgan bu muhtasham anjuman, nafaqat musulmonlar uchun, balki ular bilan diniy bagʻrikenglik tamoyillari asosida umrguzaronlik qilib kelayotgan, qoʻni-qoʻshnichilik munosabatlarini olib borayotganlar uchun ham xayrlidir.
Islom barcha xalqlarni birlikka chorlaydi. Islom diniga eʼtiqod qiluvchi barcha moʻminlar orasida tarqalgan salom soʻzi ham “Sizga tinchlik, omonlik tilayman”, degandir. Shu maʼnoda, islom nomi bilan bogʻlanayotgan xunrezliklar va noxush hodisalar zamirida chin islomga xos boʻlgan eʼtiqod yoʻq, desak, aslo yanglishmagan boʻlamiz.
Ota-bobolarimiz minglab yillar mobaynida islom diniga eʼtiqod qilib keladi. Bu ezgu din, Markaziy osiyoda yashayotgan xalqlarning urf-odatlariga qadar singib ketgan va bunda hech qanday gʻalizlik kuzatilmaydi.
Bunga sabab esa, sof islom aqidasini, uning maʼrifatini, insonparvarligiyu ezgu gʻoyalarini botil aqidalardan oriflik bilan ajratib bera olgan ulamolarning aynan Markaziy osiyodan koʻplab yetishib chiqqanidir. Bu ezgu taʼlimotlardan uzoqlashgan sari, fitnalar koʻpayigani bor gap. Shu bois, ota-bobolarimizning toʻgʻri eʼtiqod borasidagi tavisiyalari va ilmiy merosiga suyanishimiz shart.
Bugun axborot globallashuvi tufayli botil gʻoyalar bilan chalgʻiyotgan yoshlar kam emas. Shu bois, ularga eʼtiqod nuqtai-nazaridan toʻgʻri maʼlumot berish, yoshlarni botil aqidalardan oʻz vaqtida ogoh qilib borish, biz ulamolarning vazifamizdir. Alloh taolo oʻz kalomida “Agar bilmaydigan boʻlsangiz, zikr ahllaridan soʻrangiz”, deb marhamat qiladi. Allohga shukurki, Oʻrta osiyo xalqi, islom olamiga tanilgan allomalari bilan faxrlanadi. Muqaddas kalomdagi “bilganlar” ham shular, aslida.
Imom Buxoriy, Imom Termiziy, Xoja ahmad Yassaviy, Sigʻnoqiy kabi allomalar haqni botildan ajratgan, ummatga toʻgʻri yoʻlni va islom maʼrifatini koʻrsatib bergan kishilar edi. Mana shunday ajdodlarimizning moʻtadil yoʻli esa, yoshlarni radikal gʻoyalardan asrashda juda muhim. Bugungi anjuman aynan shu haqiqatni anglatishga xizmat qilmoqda.
Naurizbay Utpenov,
Qozogʻiston musulmonlari diniy boshqarmasi raisi, bosh muftiy
Vaqtini ilm-ma’rifatga sarflagan kishi yuksak darajalarga erishadi
Bugun, 25 sentyabr kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Andijon viloyatiga xizmat safari davomida juma namozini Asaka shahridagi “Ahmadali Mahdum” jome masjidida ado etdilar.
Muftiy hazratlari namozdan oldin jamoatga ilmning qadri, ta’lim-tarbiya beruvchi ustozlarning maqomi hamda vaqtni g‘animat bilish haqida manfaatli ma’ruza qilib berdilar.
Darhaqiqat, bugun yurtimizda barcha imkoniyat bor. Shunday ekan, ilm o‘rganib, ustozlarni, ota-onani, bu shart-sharoitlarni qadrlab, vaqtdan unumli foydalanish lozim.
Ma’ruzada aytilganidek, oqil inson Alloh taolo bergan fursatni to‘g‘ri tasarruf qiladi. Har kunini dunyosi va oxirati uchun foydali bo‘lgan ishlarga sarflaydi. Zero, vaqt ortga qaytmaydi, umr qayta berilmaydi. Shunday ekan, Alloh bergan bu qimmatli vaqtni ilm-ma’rifat o‘rganishga, uni boshqalarga o‘rgatishga sarflagan kishi yuksak darajalarga erishadi.
Shuningdek, Muftiy hazratlari Davlatimiz Rahbarining Andijon viloyatiga safari, xalq farovonligi yo‘lida amalga oshirilayotgan keng ko‘lamli islohotlar, bunyodkorlik ishlariga ham urg‘u qaratdilar. Bunday tarixiy yutuqlar “Inson qadri uchun” tamoyilining amaldagi ifodasi ekani, zero dinimiz ham inson qadrini oliy sanashini ta’kidladilar.
Yakunda Alloh taolo barcha ustoz va murabbiylar mehnatiga ulkan ajrlar berishini, ularning ilmidan bahramand bo‘layotganlar dinimiz va millatimizga foydali insonlar bo‘lib yetishishini so‘rab duolar qilindi.
O‘zbekiston musulmonlari idorasi Matbuot xizmati