Muhammad Al-Hajriy: Aksar kitoblarimiz Movarounnahr ulamolari qalamiga mansub
O‘zbekiston – O‘mon aloqalari turli sohalarda jadal rivojlanmoqda. Jumladan, Sultonlik yirik ulamolari ham mamlakatimizda o‘tkazilayotgan nufuzli xalqaro tadbirlarda doim faol.
Xususan, O‘mon parlamentining yuqori palatasi – Davlat Kengashi a’zosi, senator, Ijtimoiy va madaniy masalalar qo‘mita raisi, professor, doktor Muhammad bin Said bin Amar Al-Hajriy 15-16 oktyabr kunlari Toshkent va Xivada bo‘lib o‘tgan “Islom – tinchlik va ezgulik dini” mavzusidagi xalqaro ilmiy-amaliy anjumanda ishtirok etdi.
– Otamning katta kutubxonasi bo‘lib, bolaligim, asosan, o‘sha joyda o‘tgan. Rosti, kitoblarning aksariyati Movarounnahr diyoridan yetishib chiqqan ulamolar asarlari edi. Aqoid, fiqh, hadis va boshqa turli sohalarga oid manbalarning salmoqli qismi shu o‘lka olimlariga tegishli. Shu bois, bizning xalq mazkur hudud allomalarini yaxshi biladi, hurmat qiladi.
Qolaversa, bugungi konferensiyaga tashrif buyurgan mutaxassislarning bari aynan Movarounnahrdan olimlari bitiklarini o‘qib, voyaga yetgan, ilm sirlarini o‘rgangan.
Muharrama Pirmatova, O‘zA
“Arab Tourist”: Samarqand, Buxoro va Xiva — islom sivilizatsiyasi va jahon madaniy merosining bebaho durdonalari
Saudiya Arabistonining turizm va sayohatlarga ixtisoslashgan “Arab Tourist” elektron nashrida “Markaziy Osiyoning qoq markazida joylashgan va Buyuk ipak yo‘li bilan bog‘langan mamlakat” sarlavhali tahliliy maqola e’lon qilindi, deb xabar bermoqda “Dunyo” AA.
Maqolada Buyuk ipak yo‘li tarixida o‘zbek shaharlarining tutgan o‘rni alohida e’tirof etiladi. Xususan, Samarqand, Buxoro va Xiva kabi tarixiy shaharlar asrlar davomida Sharq va G‘arb o‘rtasidagi savdo, fan va madaniyat markazlari sifatida xizmat qilgani ta’kidlanadi. Registon maydoni, Ichan-qal’a va Buxorodagi me’moriy obidalar islom sivilizatsiyasi hamda jahon madaniy merosining bebaho durdonalari sifatida tilga olinadi.
Bundan tashqari, nashr O‘zbekistonning rang-barang tabiati va geografik relefiga to‘xtalib o‘tgan. Qizilqum cho‘li, serhosil Farg‘ona vodiysi, Tyan-Shan va Pomir-Oloy tog‘ tizmalari aholi joylashuvi va qishloq xo‘jaligi rivojida muhim o‘rin tutishi qayd etiladi.
Nashr, shuningdek, Buyuk Mirzo Ulug‘bek kabi donishmandlarning astronomiya va matematika sohasidagi buyuk kashfiyotlarini alohida e’tirof etgan.
Xulosada ta’kidlanganidek, Toshkent, Samarqand, Buxoro, Namangan va Andijon kabi shaharlar bugungi kunda nafaqat ma’muriy va iqtisodiy, balki jadal rivojlanayotgan yirik madaniy-turistik markazlar sifatida dunyo sayyohlari e’tiborini o‘ziga jalb etmoqda.
O‘zbekiston musulmonlari idorasi Matbuot xizmati
