E’tirof
Men bugungi halqaro anjuman sabab islom olamining 6 buyuk muhaddis olimlaridan 2 nafari – Imom Buxoriy va Imom Termiziy tavallud topgan va qo‘nim topgan maskan – O‘zbekiston hududiga kelib, u zotlarning muqaddas go‘shalarini ziyorat qilishimni nasib etgan Allohga hamdlar aytaman.
Mazkur xalqaro anjumanni tashkil etib, bizlarni unga taklif etgan O‘zbekiston Respublikasi rahbariyatiga, xususan, Prezident Shavkat Mirziyoyev janobi oliylariga o‘zimning samimiy minnatdorligimni bildiraman.
Ushbu xalqaro anjuman islom olami hadisshunoslik sohasida yangi bosqichni ochib berishi, qolaversa, Imom Termiziy va termiziy allomalarning ilmiy merosini chuqur tadqiq etishda dasturulamal bo‘lishi shubhasiz.
Prof. Dr. Nazir Muhammad Ayyad
Misr Arab Respublikasi muftiysi
Taniqli ulamolar "Imom Buxoriy" ordeni bilan taqdirlandi
Prezidentimizning "O‘zbekiston Respublikasi mustaqilligining o‘ttiz besh yilligi munosabati bilan fan, ta’lim, sog‘liqni saqlash, sport, madaniyat va san’at sohalari hamda ommaviy axborot vositalari xodimlaridan bir guruhini mukofotlash to‘g‘risida"gi Farmoni e’lon qilindi.
Bugungi kunning eng quvonchli xabari shuki, diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning jonkuyar mehnatlari yuksak darajada e’tirof etildi!
Ularning haq yo‘ldagi sa’y-harakatlari, ma’rifat tarqatishdagi fidoyiliklari davlatimiz tomonidan yuksak orden bilan munosib taqdirlandi. Bu nafaqat ularning shaxsiy yutuqlari, balki butun diniy-ma’rifiy jamoamiz uchun katta sharaf va cheksiz quvonchdir!!
"Imom Buxoriy" ordeni:
O‘zbekiston musulmonlari idorasi raisining birinchi o‘rinbosari Homidjon domla Ishmatbekov;
O‘zbekiston musulmonlari idorasi Faxriylar kengashi raisi Shayx Abdulaziz Mansur;
Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev;
Buxoro viloyati Kogon tumani "Bahouddin Naqshband" masjidi imom-xatibi Abdug‘ofur domla Razzoqov.
O‘zbekiston musulmonlari idorasining butun jamoasi, davlatimizning yuksak mukofotlariga sazovor bo‘lgan aziz ulamolarimiz va fidoiy xodimlarimizni chin qalbdan, samimiy muborakbod etadi!
Sizlarga Alloh taolodan mustahkam sihat-salomatlik, oilaviy hayotingizga fayzu baraka, xonadonlaringizga tinchlik-xotirjamlik tilaymiz. Kelgusi xayrli faoliyatlaringizda yanada ulkan zafarlar, ezgu maqsadlaringizga erishishda doimiy muvaffaqiyatlar yor bo‘lishini tilaymiz!
Hamisha elu yurtning duosida bo‘lib, dinimizga, Vatanimizga xizmat qilish sharafi bardavom bo‘lsin!
O‘zbekiston musulmonlari idorasi Matbuot xizmati