Cavol: Poyezdda suv yo‘q bo‘lganda tayammum qilish mumkinmi?

Javob: Bismillahir Rohmanir Rohiym. Agar poyezdning biror qismida suv topilmasa va namoz vaqti chiqib ketmay turib yaqin bekatga yoki manzilga yetishning imkoni bo‘lmasa, tayammum qilish mumkin. Garchi poyezd yurib ketayotgan vaqtda tashqarida suv ko‘rinib turgan bo‘lsa ham. Chunki suvning mavjudligi, ko‘rinib turishi tahorat olishni vojib qilmaydi. Balki, tahorat olish uchun undan foydalana olish qudrati topilishi shartdir. Shuning uchun fuqaholar suv mavjud bo‘lsada, uning iste’moliga qodir bo‘lmasa tayammum qilishga ruxsat berganlar. Vallohu a’lam.

O‘zbekiston musulmonlari idorasi
Fatvo markazi.