Har bir musulmon Rasululloh sollallohu alayhi vasallamning: “Sadaqa berish bilan mol-dunyo kamayib qolmaydi”[1] deb aytgan hadislarini yaxshi biladi.

Ammo insonda qanday qilib degan savol tug‘ilishi tabiiy.

Garvard professori ilmiy tadqiqotlar yordamida buni isbotlagan. Bu haqda tadqiqotchi bunday deydi: “25 yil davomida olib borgan tadqiqotlarim natijasiga ko‘ra, inson qancha ko‘p xayr-ehson qilsa, shunchalik boy bo‘lishi aniqlangan. Bu natijaga avvalo o‘zim ham ishonmadim. Ma’lumotlarda xatolik ketgan deb o‘yladim. Lekin aniq haqiqat shuki – agar siz bir dollar xayriyaga sarflasangiz, o‘rtacha taxminanda bir yarim dollar sizga qaytib keladi”.

Siz muhtojlarga yordam berish barobarida avvalo Allohning roziligini, ruhiy xotirjamlik, bu dunyo va oxiratingiz uchun yaxshiliklarni qo‘lgan kiritasiz hamda mol-dunyoingizni poklaysiz.

Garvard professori yana bunday deydi: “Shundan so‘ng, psixologlar bilan birga tadqiqotlarim ustida ish olib bordim. “Men iqtisodchiman tadqiqotlarim natijasiga ko‘ra, inson qancha ko‘p sadaqa qilsa, uning daromadi shuncha ko‘payishi aniqlandi”, deb ilmiy izlanishlarimni bayon etganimda, ular uzoq yillardan beri bu haqiqatga guvoh bo‘lib kelishligini, “sadaqa, xayriya qiladiganlar ehson qilganlari sari daromadlari ko‘payib borganini ko‘p kuzatganmiz” deyishdi”.

Qolaversa, xayr-ehson qilish kishining ruhiyatiga va jismoniy salomatligiga ijobiy ta’sir qilishi hamda iqtisodiy farovonlikni, adolatni jamiyatni shakllantirishi ham tadqiqotlarda o‘z isbotini topgan haqiqatlardan sanaladi.

Ehson-xayriya qilish – ikki tomonlama foydani jalb qiluvchi amaldir.

Davron NURMUHAMMAD