Ramazon - mehr-muruvvat, xayr-saxovat oyi
Prezidentimiz Namangan viloyatiga tashrifi davomida iftorlik tadbirlari uyushtirildi. Unga hamohang tarzda joylarda ushbu ezgu amallar davom ettirilmoqda.
Muruvvat, ahillik va hamjihatlikni ulug'lovchi ushbu fazilatli Ramazon oyida kam ta'minlangan, ijtimoiy himoyaga muhtoj kishilarni har tomonlama qo'llab-quvvatlash, oila va mahallalarda mehr-oqibat va o'zaro hurmat muhitini mustahkamlash borasida izchil ishlar amalga oshirilmoqda. Bu an'ana bugun umummilliy harakatga aylandi.
Bugun Pop tumanida "Koshona" tantanalar majmuasida O'zbekiston Musulmonlar idorasi tashabbusi bilan tuman hokimligi va tuman "Inson" ijtimoiy xizmatlar markazi hamkorligida tumandagi 300 nafar kam ta'minlangan, ijtimoiy himoyaga muxtoj, nogironligi bo'lgan shaxslarga iftorlik dasturxoni yozildi.
Tadbirda O'zbekiston musulmonlari idorasining Namangan viloyat bosh imom-xatibi Musoxon Abbasiddinov, Namangan viloyati hokimligining jamoat va diniy tashkilotlar bilan aloqalar kotibiyati mudiri Ahadjon Dadamirzayevich, Pop tumani hokimi A'zamjon Sultonov boshchiligidagi sektor rahbarlari ishtirok etdilar.
Duoga qo'l ochgan fuqarolarimiz yurtga tinchlik-omonlik so'radilar, bunday hur, emin-erkin zamonning qadriga etish, shukrona keltirish lozimligini ta'kidladilar.
O'zbekiston musulmonlari idorasi
Namangan viloyati vakilligi Matbuot xizmati
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »