Tailandliklar uchun “Umra+” Buxorodan boshlandi
Yigirma nafardan ziyod ilk tailandlik musulmonlar “Umra+” dasturi asosida Buxoro bo‘ylab ham sayohat, ham ziyorat amallarini bajo keltirdi.
Dastlab “Yetti pir”ni ziyorat qilib, ziyoratgohlarda yaratilgan shart-sharoitlar bilan yaqindan tanishdi. So‘ng, eski shahar bo‘ylab sayohatni davom ettirdi.
– Buxoroga ilk kelishimiz, – deydi sayyohlardan biri. – Bu yerdagi insonlarning mehmondo‘stligi, samimiyligini boshqa davlatlarda ko‘rmadik. Men Buxoroga yana kelishga niyat qildim.
Xorijlik ziyoratchilar ziyorat amallarini bajo keltirib, Umra safariga yo‘l oldi.
Zarif Komilov,
O‘zA muxbiri
Har bir murojaat ortida inson taqdiri bor (fotolavha)
O‘zbekiston musulmonlari idorasi tomonidan yo‘lga qo‘yilgan ochiq va samimiy muloqot tizimi fuqarolar murojaatlarini atroflicha o‘rganish hamda ularga tezkor yechim topishda muhim omil bo‘lmoqda.
Bugun, 26 avgust kuni O‘zbekiston musulmonlari idorasi raisi o‘rinbosari Zayniddin domla Eshonqulov navbatdagi fuqarolar qabulini o‘tkazib, yurtdoshlarimizning taklif va murojaatlarini tingladi.
Yuzma-yuz muloqot jarayonida masjidlar holati va faoliyati, imom-xatiblar ishi, haj va umra ziyoratlarini tashkil etish, oilaviy munosabatlarni tartibga solish hamda moddiy yordam ko‘rsatishga oid qator masalalar ko‘rib chiqildi.
Murojaatlarning aksariyati joyida ijobiy hal etilgan bo‘lsa, qo‘shimcha o‘rganish talab qiladigan masalalar yuzasidan tegishli mutasaddilarga aniq ko‘rsatmalar berildi.
Eslatib o‘tamiz, bu kabi ochiq muloqot tadbirlari Diniy idoraning hududiy vakilliklari hamda yurtimizdagi barcha jome masjidlarda har haftaning chorshanba kuni muntazam o‘tkazib kelinmoqda.
O‘zbekiston musulmonlari idorasi
Matbuot xizmati
