Cavol: Odamlar orasida balog‘atga yetmagan yosh bolaning yaxshi amallari savobi ota-onasiga yoziladi degan gap bor. Shu gap to‘g‘rimi?

Javob: Bismillahir Rohmanir Rohiym. Bu haqda “E’lous sunan” kitobida bunday deyiladi: “To‘rt mazhab imomlari yosh bola qilgan toatlari uchun savob olishi va bu uchun unga yaxshiliklar yozilishiga ittifoq qilishgan. Ammo uning savoblari faqat o‘ziga bo‘ladimi yoki uning ajri kamaymagan holda ota-onasiga ham yoziladimi degan masalada turli fikr aytib, dalillar kelgani uchun ikkinchi fikr (ota-onaga ham savob bo‘lishi)ni ustun ko‘rishgan”.

Payg‘ambarimiz sollallohu alayhi vasallamning quyidagi hadislari ham buni qo‘llaydi: “Inson vafot etganda uning amali to‘xtaydi, faqat uch narsa tufayli uning noma’i a’moliga savob yozib turiladi: Sadaqai joriya, foydali ilm, duoi xayr qiluvchi solih farzand” (Imom Muslim rivoyati).

Demak, har ikki qarashga ko‘ra ham farzandlarini yaxshilikka yo‘llagan, chiroyli ta’lim-tarbiya bergan ota-onalar savob oladilar, Alloh taoloning fazli kengdir. Vallohu a’lam.

O‘zbekiston musulmonlari idorasi
Fatvo markazi