Bismillahir Rohmanir Rohiym
Kunlarning birida Rasululloh sollallohu alayhi vasallam sahobalari bilan birga o‘tirardilar. Shu payt bir a’robiy Payg‘ambarimiz sollallohu alayhi va ’alaa olihi vasallamning oldilariga savol so‘rab keldi.
Sahobalar badaviylar savol so‘rashsa juda xursand bo‘lib ketardilar. Chunki badaviylar sahobalar tortingan savollarni berishdan aslo uyalmasdilar.
A’robiy: “Yo Allohning Rasuli, menga yaxshilikni o‘rgating”, dedi.
Rasululloh sollallohu alayhi vasallam uning qo‘lidan ushlab turib: “Subhanalloh valhamdulillah va laa ilaha illallohu vallohu akbar, deb ayt” dedilar.
E’tibor bering, Rasululloh sollallohu alayhi vasallam badaviyning qo‘lidan ushlab so‘zladilar. Biror kimsa bilan gaplashayotganda suhbatdoshning qo‘lidan ushlab yoki yelkasiga qo‘lni qo‘yib so‘zlash juda ta’sirli uslub sanaladi.
Rasululloh sollallohu alayhi vasallam ham savolga javob berishga shoshilmadilar, balki oldin badaviyning qo‘lidan tutib, keyin javob berdilar.
Biroz o‘tib, haligi badaviy bir tafakkur qilib yana qaytib keldida: “Yo Rasululloh sollallohu alayhi vasallam “Subhanalloh valhamdulillah va laa ilaha illallohu vallohu akbar” bular Alloh uchun, men uchunchi?” dedi.
Rasululloh sollallohu alayhi vasallam tabassum qildilar va: “Agar “Subhanalloh” desang, Alloh taolo “rost so‘zlading” deydi, “Alhamdulillah” deb aytsang, Alloh “rost so‘zlading” deb aytadi, “Laa ilaha illallohu” desang, Alloh “rost so‘zlading” deydi, “Allohu akbar” deb aytsang, Alloh taolo “rost so‘zlading” deb aytadi. Agar “Allohummag‘firliy” deb aytsang, Alloh “kechirdim” deydi, “varhamniy” desang, Alloh “rahm qildim” deydi, “varzuqniy” deb aytsang, Alloh “rizqlantirdim” deb javob beradi”, dedilar.
A’robiy barmoqlari bilan yetti narsani sanadida, so‘ng yana ortiga qaytib ketdi.
Yana boshqa hadislarda Rasululloh sollallohu alayhi vasallam: “Alloh taologa kalomlarning eng sevimlisi to‘rttadir: Subhanallohi valhamdulillahi va laa ilaha illallohu vallohu akbar”;
“Subhanallohi valhamdulillahi va laa ilaha illallohu vallohu akbar, deb aytishim men uchun quyosh chiqib, nur sochganidan yaxshiroqdir”, deganlar (Imom Muslim rivoyati).
Ushbu zikrlarni ayniqsa bomdod namozidan so‘ng quyosh chiqquniga qadar 100 marotabadan aytishning ajru mukofoti nihoyatda katta. Ulkan savoblarga, gunohlarning kechirilishiga va boshqa foydalarga erishtiradi.
Rasululloh sollallohu alayhi vasallam aytadilar: “Isro kechasi Ibrohim alayhissalomga yo‘liqdim. U zot: “Yo Muhammad, ummatingizga mendan salom ayting va jannatning tuprog‘i pok, suvi shirin va o‘simligi “Subhanallohi valhamdulillahi va laa ilaha illallohu vallohu akbar” ekanining xabar bering”, dedilar (Imom Termiziy rivoyati).
Ushbu to‘rt zikr “Subhanallohi valhamdulillahi va laa ilaha illallohu vallohu akbar”ni aytishga ko‘p bilan bor yo‘g‘i 10 soniya (sekund) ketadi. Ammo Alloh taolo bu zikrlar sababli rizqingizni qanchalik keng qiladi. Ko‘pchilik rizq deganda, faqatgina moddiy boylikni tushunadi. Ammo namozingizni ado etishingiz, uyga sog‘-omon qaytib borishingiz va ahli ayolingiz sizni xursand holda kutib olishi, Qur’oni karimdan bir oyat bo‘lsa ham o‘qiy olishingiz, hatto ushbu videolavhani ko‘rishingiz ham Alloh bergan rizqdir.
“Subhanalloh valhamdulillah va laa ilaha illallohu vallohu akbar. Allohummag‘firliy varhamniy varzuqniy”....
Alloh taolo barchamizni O‘zini ko‘p zikr qiluvchi zokir bandalaridan qilsin.
Davron NURMUHAMMAD
Shu yil 5 iyun kuni - hijriy zulhijja oyining to‘qqizinchi kuni ziyoratchilarimiz Mino vodiysidan erta tongdan guruh-guruh bo‘lib zamonaviy avtobuslarda Arafot maydoniga yetib kelishdi. Ushbu muborak joyda hamyurtlarimiz uchun alohida ajratilgan joyda barcha tayyorgarliklar hozirlab qo‘yilgan.
Ishchi guruhi tomonidan ziyoratchilarimiz xotirjam ibodat qilishlari uchun keng va shinam chodirlar tayyorlangan, sovutkich va muzlatkichlar uzluksiz ishlamoqda, uch mahal issiq ovqat, shirinlik va salqin ichimliklar muntazam taqdim etilmoqda.
Alloh taolo barcha hojilarning hajlarini mabrur, elu yurt haqqiga qilgan duolarini qabul aylasin!
O‘zbekiston musulmonlari idorasi
Matbuot xizmati