Qur’onda zikri kelgan ne’matlar
Anor
“U ikkisida (mazkur ikki bog‘da) meva, xurmo va anorlar bordir” (Ar-Rahmon surasi, 68-oyat).
“Shuningdek, uzumzor bog‘lar, bir-biriga o‘xshagan va o‘xshamagan zaytun va anorlarni (chiqardik). (An’om surasi, 99-oyat)
“U (Alloh) shunday zotki, (so‘ritoklarga) ko‘tarib qo‘yiladigan va ko‘tarib qo‘yilmaydigan (uzumzor) bog‘larni, ta’mi turlicha (bo‘lgan) xurmo va mevali daraxtlarni, (rang va ta’mda) o‘xshash va o‘xshamas zaytun va anorlarni paydo qildi.” (An’om surasi, 141-oyat).
Anor Qur’onda bir necha bor zikr qilingan. Anorning mag‘zi ham, po‘stlog‘i ham koni foyda. Anor sharbat ko‘rinishida ham iste’mol qilinadi. Uning po‘sti va pardevorlaridan damlamalar tayyorlab ichish foydali.
Anorning shifobaxsh jihatlari:
- Organizmni tozalaydi. Anorni iste’mol qilish qon bosimini me’yorga keltiradi, jigarni tozalaydi, ortiqcha suyuqlikni organizmdan chiqaradi.
- Gijjadan xalos qiladi. Quritilgan anor po‘stlog‘i qaynatiladi va bir hafta davomida ertalab och qoringa ichiladi. Bu amaliyot bilan gijjalardan xoli bo‘lasiz.
- Asabiylikning oldini oladi. Hayot tashvishlari bilan bo‘lib halovatsizlik, yurak siqilishi, asabiylik va tez kayfiyat o‘zgarishidan aziyat cheksangiz, anor po‘stini yarim litr suvda qaynatib ichish foydalidir. Turli yallig‘lanishlar, jigar xastaliklarida ham ichilishi samara beradi.
- Immunitetni ko‘taradi. Kuz-qish mavsumini gripp va shamollashlarsiz o‘tkazmoqchi bo‘lsangiz, har kuni bir necha 10 dona anor iste’mol qilishni odat qiling. Anor S vitaminiga boyligi sabab shamollashda yordam beradi. Anorni turli salatlarga qo‘shib tanovvul qilish ham mumkin. Qon aylanishini yaxshilaydi, ichaklarni tozalab, yuz ko‘rinishingizni tiniqlashtiradi.
- Suyaklarni mustahkamlaydi. Yoshi ulug‘ insonlar kunora anor yeb turishlari shart. Negaki, tarkibidagi kal’tsiy kattalarda uchraydigan osteoxondrozga qarshi kurashadi. Anor sharbati ichilganda insult va infarkt xavfi kamayadi. U xotirani mustahkamlaydi. Vazn tashlashda ham yordam beradi.
Anorni me’yoridan ko‘p iste’mol qilish ham mumkin emas. Anor tarkibidagi moddalar tish emalini yemirishi mumkin. Anor yeb bo‘lgach, og‘izni issiq suvda chayish tavsiya qilinadi. Anorni ko‘p yeyish qabziyatga ham sabab bo‘ladi.
Shohruh Ubaydullayev
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »