Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

1. Rasululloh sollallohu alayhi vasallam: «Sahifasida ko‘p istig‘for topgan kishiga tubo – jannat bo‘lsin», dedilar (Ibn Moja rivoyati).

2. Abu Hurayra roziyallohu anhudan rivoyat qilinadi. Rasululloh sollallohu alayhi vasallam: «Nafsim qo‘lida bo‘lgan Zot ila qasamki, agar gunoh qilmasangiz, Alloh sizlarni ketkazib, o‘rningizga gunoh qilib, istig‘for aytadigan bir qavmni keltirur va ularni mag‘firat qilur», dedilar (Muslim va Ahmad rivoyati).

3. Rasululloh sollallohu alayhi vasallam: «Qaysi banda gunoh qilib, so‘ngra tahorat qilsa, tahoratini mukammal qilsa, so‘ng turib ikki rak’at namoz o‘qisa, keyin o‘sha gunohiga istig‘for aytsa, Alloh albatta uni kechiradi», dedilar (Ahmad, Nasoiy va Termiziy rivoyati).

 4. Rasululloh sollallohu alayhi vasallam Oisha roziyallohu anhoga qarab: «Agar bir gunoh bilan alamlansang Allohga istig‘for ayt va tavba qil. Albatta gunohdan tavba nadomat va istig‘for aytishdir» dedilar (Bayhaqiy rivoyati).

5. Nabiy sollallohu alayhi vasallamning mavlolari Zayddan rivoyat qilinadi: Rasululloh sollallohu alayhi vasallam: «Kim «Astag‘firullohallaziy laa ilaha illaa huval hayyul qoyyumu va atuubu ilayh» desa, hatto jangdan qochgan bo‘lsa ham, uning gunohlari kechiriladi», dedilar (Abu Dovud rivoyati).

Ma’nosi: O‘zidan o‘zga iloh yo‘q, Hayyul Qoyyum bo‘lgan Allohga istig‘for aytaman va U Zotga tavba qilaman.

6. Rasululloh sollallohu alayhi vasallam: «Gunoh qilgan har bir musulmon yaxshilab tahorat qilib, ikki rak’at namoz o‘qib, so‘ngra istig‘for aytsa, albatta, Alloh uni kechiradi», dedilar va ushbu oyatni o‘qidilar: «Va fahsh ish yoki o‘zlariga zulm qilib qo‘yganlarida Allohni eslab, gunohlarini mag‘firat qilishini so‘rarlar» (Oli Imron surasi, 135-oyat) (Termiziy rivoyati).

7. Abdulloh ibn Umar roziyallohu anhumodan rivoyat qilinadi: «Bir majlisda Rasululloh sollallohu alayhi vasallamning «Robbig‘firliy va tub ’alayya, innaka antat tavvaabur rohiym» deb yuz marta aytganlarini sanaganmiz» (Abu Dovud rivoyati).

Ma’nosi: Robbim! Meni mag‘firat qil, tavbamni qabul qil, axir Sen tavbalarni qabul qiluvchisan, rahmlisan.

8. Rasululloh sollallohu alayhi vasallam: «Kimni (amal) sahifasi xursand qilishini yaxshi ko‘rsa, bas, unda istig‘forni ko‘paytirsin», dedilar (Bayhaqiy rivoyati).

9. Anas ibn Molik roziyallohu anhu aytadi: «Rasululloh sollallohu alayhi vasallamning shunday deganlarini eshitganman: «Alloh tabaroka va taolo shunday deydi: «Ey Odam bolasi! Modomiki Menga duo qilar ekansan, Mendan umidvor bo‘lar ekansan, Men sendagi jamiki narsani mag‘firat qilaman, parvo qilmayman. Ey Odam bolasi! Agar gunohlaring osmonning tepasiga yetgan bo‘lsa ham, keyin Menga istig‘for aytsang, seni mag‘firat qilaman, parvo qilmayman. Ey Odam bolasi! Menga yer yuzi to‘la gunoh bilan ro‘baro‘ kelsang ham, Menga shirk keltirmagan holda Menga yo‘liqsang, Men senga uni (yerni) to‘ldiradigan mag‘firat bilan ro‘baro‘ kelaman» (Termiziy rivoyati).

Anvar Tursunov
«Hilol» jurnali 4 (61) son