Ko‘zingdan parda olib tashlanganida
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Bir kuni Hasan roziyallohu anhu uyidan yangi, toza kiyimlar kiyib, viqor bilan ko‘chaga chiqdi. Bir guruh do‘stlari, xodimlari bilan Madina ko‘chalarining birida ketayotib, yelkasida bir mesh suv ko‘tarib olgan, qashshoqlikdan ezilgan keksa yahudiyni uchratib qoldi. Qariya Hasan roziyallohu anhuni bunday ko‘rkam kiyimda ko‘rib, chiday olmadi, «Iltimos, birpas to‘xtab, so‘zimga quloq soling!» dedi. Hasan roziyallohu anhu to‘xtadi. Yahudiy: «Ey Rasulullohning nabirasi! Menga rahm qiling, adolat qiling! Bobongiz Rasululloh sollallohu alayhi vasallam: «Dunyo mo‘minning zindoni, kofirning jannatidir», degan edilar. Lekin ko‘rib turibmanki, siz bu dunyoda ham ne’matlarga ko‘milib, farovon yashayapsiz. Unda bo‘lsa, bu dunyo siz uchun jannat, men uchun esa do‘zax ekan-da? Axir men qiyinchilikda, qashshoqlikda yashayapman. Lekin siz mo‘minsiz, men esa unday emas», dedi.
Hasan roziyallohu anhu bunday dedi: «Ko‘zingdan parda olib tashlanganida, Alloh taolo menga va barcha mo‘minlarga jannatda qanday ne’matlar tayyorlab qo‘yganini ko‘rganingda edi, bu dunyo shunchalik go‘zalligiga qaramay, biz uchun zindonligini ko‘rgan bo‘larding. Alloh taolo senga va barcha kofirlarga do‘zaxda qanday azobu qiynoqlar tayyorlab ko‘yganini ko‘rganingda, shunchalik qashshoq, parishonligingga qaramay, bu dunyo sen uchun jannat ekanligini tushungan bo‘larding».
Darhaqiqat, musulmonlar bu dunyoda qanchalik farovon yashamasin, jannatdagi ne’matlar oldida hech narsa emas. Xuddi shunga o‘xshab, musulmon bo‘lmaganlar ham bu dunyoda farovon yashayotgan bo‘lsa, bu Alloh taoloning Rohman ismining bir tajalliysi bo‘lib, vaqtinchalik berilgan inoyatdir, oxiratda ko‘riladigan azoblarning qarshisida hech narsa emasdir.
«Kim dunyoni istasa, dunyo uni yerga uradi!»
Hasan roziyallohu anhu o‘rni kelganda, odamlarga nasihat qilib, hayotda boshqalarga ibrat bo‘lib yashash, go‘zal xulq-atvor egasi bo‘lish lozimligini aytar edi. U o‘zining ijtimoiy hayotga oid maslahatlaridan birida bunday degan: «Kimki dunyoni xohlasa, dunyo uni yerga uradi! Kimki dunyoga qalbini bog‘lamasa, unga parvo qilmaydi. Kimki dunyoni sevsa, u boylarning quliga aylanadi. Kechagi kuni bilan bugungi kuni teng bo‘lgan kishi ziyonda, kimning o‘tmishi bugunidan yaxshiroq bo‘lsa, u ham ziyondadir. O‘zini mukammal deb hisoblagan odamda kamchilik ko‘p bo‘ladi. Go‘zal axloq insonga ziynatdir. Sadoqat boylikdir. Shoshqaloqlik yengillikdir. Qalbi dunyoga bog‘langan odamlar bilan birga o‘tirish dog‘dir. Yomon odamlar bilan birga bo‘lish esa o‘zgalarda shubha uyg‘otadi».
«Millioner sahobalar» kitobidan
Saudiya Arabistonida o‘tkazilayotgan xalqaro Qur’on tanlovida 133 davlat vakillari ishtirok etmoqda
Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi 7 avgust kuni Makka shahridagi musobaqalar o‘tkaziladigan joyda 133 davlatdan 334 nafar ishtirokchi (erkak va ayollar) ishtirokida boshlandi.
IQNA "Minbar" gazetasiga tayanib xabar berishicha, Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi bir kun avval Makkadagi musobaqalar o‘tkaziladigan joyda boshlangan va final bosqichini Masjidul Haromda o‘tkazish uchun zamin tayyorlagan.
Saudiya Arabistoni Islom ishlari, da’vat va hidoyat vazirligi tomonidan tashkil etilgan ushbu tadbirning saralash bosqichida hakamlar hay’atlari eng yuqori aniqlik va shaffoflik standartlariga rioya qilgan holda, Qur’on tilovati uslublari va qoidalariga ixtisoslashgan taniqli xalqaro hakamlar guruhi nazorati ostida erkak va ayol ishtirokchilarning chiqishlarini tinglab, final bosqichiga kimlar o‘tishini aniqladi.
Tanlovning joriy bosqichi 133 mamlakatdan 334 nafar ishtirokchi (erkak va ayollar) ishtirokida o‘tkazilmoqda, ular besh toifa: "Shatibiya" usuli bo‘yicha yetti xil qiroat asosida Qur’oni Karimni to‘liq yodlash (qiroat va nazariy bilimlarni, shuningdek, tajvid qoidalarini a’lo darajada bajarish va rioya qilishni o‘z ichiga oladi); a’lo darajada ijro etish, tajvidga rioya qilish va so‘zlarni sharhlash bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan ketma-ket o‘n beshta juzni yodlash; a’lo darajada ijro etish va tajvidga rioya qilish bilan ketma-ket beshta juzni yodlash bo‘yicha bellashmoqda.
Vazirlik ushbu global qur’oniy tadbirning muvaffaqiyatini ta’minlash uchun elektron hakamlik tizimini joriy etish, ishtirokchilarni baholashda adolat va aniqlikni ta’minlash uchun tashkiliy va keng qamrovli platformani yaratish, shuningdek, ularga turli xil xizmatlarni taqdim etish kabi barcha imkoniyatlarini ishga solishda davom etadi.
Qirol Abdulaziz nomidagi xalqaro musobaqa dunyodagi eng yirik Qur’on musobaqalaridan biri hisoblanib, uning umumiy pul mukofotlari miqdori 10 million saudiya rialidan oshadi.
Mazkur musobaqada O‘zbekiston sharafini "Mir Arab" o‘rta maxsus islom ta’lim muassasasi, "Sayyid Muhiddin maxdum" o‘rta maxsus islom ta’lim muassasasi, Imom Buxoriy nomidagi Toshkent islom instituti hamda "Xadichai Kubro" qizlar o‘rta maxsus islom bilim yurti talabalari himoya qilishi haqida avval xabar berilgan edi.
O‘zbekiston musulmonlari idorasi Matbuot xizmati
