Farzandning haqqiga qanday duo qilish kerak?
Ota-onaning duosi shubhasiz qabul bo‘ladi.
Rasululloh sollallohu alayhi vasallam: “Har bir narsa bilan Alloh azza va jallaning orasida parda bor. Faqatgina “Laa ilaha illalloh” shahodati va ota-onaning duosi bundan mustasno”, dedilar.
Boshqa hadisda Nabiy sollallohu alayhi vasallam: “Ota-onaning duosi Alloh azza va jalladan to‘silmaydi”, deganlar.
Farzandning haqqiga qanday duo qilish kerak?
1. Farzandingiz namozni qoim qiluvchilardan bo‘lishini so‘rab duo qiling. Chunki “...namoz fahsh va munkardan qaytarur” (Ankabut surasi, 45-oyat).
Farzandingiz namozxon bo‘lishi uchun quyidagi duoni o‘qing:
﴿رَبِّ ٱجۡعَلۡنِي مُقِيمَ ٱلصَّلَوٰةِ وَمِن ذُرِّيَّتِيۚ رَبَّنَا وَتَقَبَّلۡ دُعَآءِ﴾
O‘qilishi: “Robbij’alniy muqiymas solaati va min zurriyyatiy Robbanaa va taqobbal du’aai”.
Ma’nosi: “Robbim! Meni va zurriyotlarimni namozni to‘kis ado etadiganlardan qilgin. Robbimiz, duoni qabul etgin” (Ibrohim surasi, 40-oyat).
2. Farzandingiz ko‘zingiz quvonchi bo‘lishini so‘rab ushbu duo qiling:
﴿رَبَّنَا هَبْ لَنَا مِنْ أَزْوَٰجِنَا وَذُرِّيَّٰتِنَا قُرَّةَ أَعْيُنٍ وَٱجْعَلْنَا لِلْمُتَّقِينَ إِمَامًا﴾
O‘qilishi: “Robbana hablana min azvajina va zurriyyatina qurrota a’yunin vaj’alna lil-muttaqiyna imama”.
Ma’nosi: “Parvardigoro, xotinlarimizdan va zurriyotlarimizdan bizga ko‘z quvonchini baxsh et va bizlarni taqvodorlarga peshvo qilgin!” (Furqon surasi, 74-oyat).
Farzandingiz solih ekanini ko‘rsangiz ko‘zlaringiz quvonchga to‘ladi. Ota-onangiz duosini olib qoling, ota-onasi borlar...
Davron NURMUHAMMAD
Hindistonlik general: «Usmon Mus'hafi men uchun eng ta’sirli eksponat bo‘ldi»
Hindiston Respublikasi Mudofaa vazirligi kotibiyati boshlig‘i, general Dinesh Kumar O‘zbekistondagi Islom sivilizatsiyasi markaziga tashrif buyurdi. Markaz bilan tanishuv davomida mehmon, ayniqsa, Usmon Mus'hafini ko‘rib chuqur taassurot olganini ta’kidlab, uni bu yerdagi eng noyob va unutilmas yodgorliklardan biri, deya e’tirof etdi.
Tashrif chog‘ida general Dinesh Kumar muzeyning boy ekspozitsiyalari bilan batafsil tanishdi. U islomgacha bo‘lgan davr sivilizatsiyasi, Islom sivilizatsiyasining taraqqiyot bosqichlari, Birinchi va Ikkinchi Renessans davrlariga bag‘ishlangan galereyalar, buyuk allomalarning hayoti va ilmiy merosi, nodir qo‘lyozmalar hamda zamonaviy raqamli texnologiyalar asosida yaratilgan interaktiv ekspozitsiyalarni katta qiziqish bilan ko‘zdan kechirdi.
Mehmon ekspozitsiyalar tarixiy merosni zamonaviy muzeyshunoslik yechimlari orqali jonli va ta’sirchan tarzda namoyon etayotganini yuqori baholadi. Uning ta’kidlashicha, har bir galereya o‘zaro uzviy bog‘langan bo‘lib, tashrif buyuruvchilarga O‘zbekiston va butun mintaqa sivilizatsiyasi tarixini yaxlit holda anglash imkonini beradi.
General Dinesh Kumar bunday dedi:
➖ Bu haqiqatan ham hayratlanarli maskan. Delegatsiyam bilan birgalikda bu yerga kelib, katta taassurotlar oldik. Markazning me’moriy qiyofasi, ekspozitsiyalarning yuksak saviyada tashkil etilgani hamda islomgacha bo‘lgan davrdan tortib bugungi kungacha bo‘lgan tarixning izchil va ta’sirchan tarzda yoritilgani meni chuqur hayratga soldi. Ayniqsa, zamonaviy texnologiyalar yordamida tarixni jonlantirish usuli tahsinga sazovor. Bu yerda har bir ekspozitsiya o‘tmishni nafaqat ko‘rish, balki uni chuqur his qilish imkonini ham beradi.
Bizga namoyish etilgan Usmon Mus'hafi so‘z bilan ta’riflab bo‘lmaydigan darajada noyob meros ekan. Bu men uchun eng ta’sirli eksponat bo‘ldi va uni umrim davomida eslab yuraman.
O‘zbekistonga keladigan har bir sayyoh ushbu maskanni albatta ko‘rishi kerak. Biz Hindistonga qaytgach, do‘stlarimiz va hamkasblarimizga ham bu yerga tashrif buyurishni tavsiya qilamiz.
Tashrif yakunida general Dinesh Kumar O‘zbekistondagi Islom sivilizatsiyasi markazi mamlakatning ko‘p asrlik tarixiy va ma’naviy merosini zamonaviy texnologiyalar bilan uyg‘un holda namoyon etayotgan, xalqaro ahamiyatga ega ilmiy-ma’rifiy maskan ekanini alohida ta’kidladi.
iccu.uz
