Zimmiyni o‘ldirib qo‘ygan musulmon
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Imom Bayhaqiy va Abdurrazzoq Qosim ibn Abu Bazzadan rivoyat qiladilar:
«Shomda musulmon odam ahli zimmadan bo‘lgan bir kishini o‘ldirib qo‘ydi. Bu haqda Abu Ubayda ibn Jarroh roziyallohu anhuga yetkazildi. U Umar ibn Xattob roziyallohu anhuga maktub yozdi. Umar unga: «Agar bu ish uning odati bo‘lsa, bo‘ynidan chop. Agar bilmasdan qilgan bo‘lsa, xunga to‘rt ming to‘lat», deb yozdi».
Ochiq-oydin ko‘rinib turibdiki, Islom hukumati ahli zimmaning jonini ham xuddi musulmonning jonini himoya qilgandek himoya qilmoqda.
Afsuski, Islom ta’limotidan uzoq bo‘lish oqibatida ko‘pchilikda Islom jamiyati musulmonlardan boshqalarni o‘ldirishni o‘ziga vazifa qilib olgan, degan tasavvur paydo bo‘lib qolgan.
Mana, bir yahudiy kishini o‘ldirib qo‘ygan musulmonga qarshi qanday hukm chiqarilganiga o‘zimiz guvoh bo‘lib turibmiz. Bu narsa ko‘rgazma uchun qilingan yakkayu yagona holat emas, balki umumiy qoidadir.
«Hadis va hayot» kitobining 23-juzidan olindi
Bayram shukuhi Jizzaxda ham davom etmoqda
O‘zbekiston Respublikasi davlat mustaqilligining 35 yilligi arafasida “Vaqf” xayriya jamoat fondining Jizzax viloyati filiali tomonidan xayriya tadbiri tashkil etildi.
Viloyatning turli hududlaridan bo‘lgan boquvchisini yo‘qotgan 35 nafar bolaning xatna to‘yi qilib berildi.
Tadbirda bolajonlarga velosiped, kostyum-shim va ko‘ylaklar, shirinliklar qutisi sovg‘a qilinib, bayram dasturxoni yozildi.
Bolajonlarga qo‘shilib, ularning yaqinlari ham quvonchdan tashakkur aytib, tashkilotchilar, Yurtboshimiz haqlariga duolar qilishdi.
Shuningdek, tadbir doirasida ijtimoiy himoyaga muhtoj, boquvchisini yo‘qotgan hamda kam ta’minlangan oilalar farzandlariga e’tibor va g‘amxo‘rlik ko‘rsatilib, ularga ham hadyalar ulashildi.
Bunday ezgu tashabbuslar jamiyatda o‘zaro mehr-oqibat, saxovat va hamjihatlik muhitini mustahkamlash, yosh avlod qalbida Vatanga muhabbat va insonparvarlik tuyg‘ularini yuksaltirishga xizmat qiladi.
O‘zbekiston musulmonlari idorasi
Matbuot xizmati
