Farzandingiz qalbiga iymon nuri qayerdan kiradi?
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Farzandingizga bolaligida Qur’on o‘qiting. Uning qalbini Qur’oni Karim ila munavvar qiling. Undan keyin uni har qanday ishga qo‘ying, inshaalloh va yana inshaalloh, albatta, Qur’oni Karimning anvoru barakotlari uni tark etmaydi. Bolangizga hamma narsadan oldin Qur’onni o‘rgatib qo‘ysangiz, iymon urug‘ini uning qalbiga mustahkam joylab qo‘ygan bo‘lasiz. Tajribalarda ko‘rilgan ish shuki, yoshligida Qur’oni Karimni o‘qib-o‘rgangan bolalar keyinchalik qanday muhitga tushsalar ham, iymon urug‘i ularning qalbida turaveradi.
Ammo siz bolaga yoshligida «bismillah», «subhanalloh», «alhamdulillah» kalimalarini, Qur’oni Karimni o‘rgatish o‘rniga, it-mushukni tanitsangiz, aqliga hayvonlarni joylab qo‘ysangiz, uning qalbiga iymon nuri qayerdan kiradi? Islom muhabbati qayerdan keladi? Oxiratning g‘am-tashvishi qanday paydo bo‘ladi? Tarbiyamiz shunaqa bo‘lganidan keyin chor tarafimizda moddaparast odamlarning izg‘ib yurishi tabiiy hol. Undaylarda Alloh taoloning huzurida turish hissi ham yo‘q. Undaylar o‘zlariga zulm qiladi. O‘zgalarning esa, terisini shilib oladi.
«Nasihatlar guldastasi» kitobidan
Ilmiy-amaliy anjuman doirasida bir guruh ustoz va xodimlar munosib taqdirlandi
O‘zbekiston musulmonlari idorasi tomonidan tashkil etilgan «Zamonaviy diniy ta’lim: pedagogika, ilm-ma’rifat va innovatsiya» mavzusidagi I ilmiy-amaliy anjumani doirasida sohada alohida o‘rnak ko‘rsatgan ustozlarni taqdirlash marosimi bo‘lib o‘tdi.
Anjumanda Davlatimiz Rahbari tashabbuslari bilan har jabhada amalga oshirilayotgan islohotlar qatorida ilm-fanni taraqqiy ettirish, ajdodlar merosini o‘rganish, diniy ta’limni rivojlantirish va sohaga ko‘rsatilayotgan yuksak e’tibordan mamnunlik kayfiyati hukm surdi.
Diniy idora tasarrufidagi oliy va o‘rta maxsus diniy ta’lim muassasalarida samarali faoliyat yuritib, yoshlarga ta’lim-tarbiya berish, soha rivojiga munosib hissa qo‘shish hamda dinimizning sofligini asrash yo‘lida fidokorona mehnat qilayotgan bir guruh pedagog va mudarrislar mehnati munosib e’tirof etildi.
Tadbir davomida sohadagi fidokorona va samarali mehnatlari uchun quyidagi ustoz va pedagoglar Faxriy yorliq hamda Umra yo‘llanmalari bilan mukofotlandi:
- Rahmatulla Umarov — Sayyid Muhyiddin maxdum o‘rta maxsus islom ta’lim muassasasi o‘qituvchisi.
- Maxtumquli Toshqulov — Xoja Buxoriy o‘rta maxsus islom ta’lim muassasasi o‘qituvchisi.
- Azimxon Abdullayev — Hidoya o‘rta maxsus islom ta’lim muassasasi o‘qituvchisi.
- Abdulbosit Rahimov — Mir Arab o‘rta maxsus islom ta’lim muassasasi o‘qituvchisi.
Shuningdek, anjuman doirasida diniy ta’lim tizimida namunali rahbarlik qilgan, fidokorona pedagogik va ilmiy-faoliyat olib borgan,ta’lim muassasalarining moddiy-texnik bazasini mustahkamlash, to‘garaklarni samarali tashkil etishdagi alohida xizmatlari uchun yana 15 nafar rahbar va o‘qituvchilar O‘zbekiston musulmonlari idorasining Faxriy yorliqlari hamda esdalik sovg‘alari — televizor, noutbuk va planshetlar bilan taqdirlandi.
O‘zbekiston musulmonlari idorasi jamoasi taqdirlangan barcha ustoz va xodimlarni ushbu yuksak e’tirof bilan samimiy muborakbod etib, ularning kelgusi ilmiy va pedagogik faoliyatlarida ulkan zafarlar tilaydi.
O‘zbekiston musulmonlari idorasi Matbuot xizmati
