Ayollarga misvok ishlatish mumkin emasmi?
Cavol: Ayol kishi ham misvok tutadimi?
Javob: Bismillahir Rohmanir Rohiym. Ha, ayollar ham tishlarni tozalash uchun misvok ishlatishi sunnat amal. Misvok faqat erkaklarga xoslanmagan. Payg‘ambarimiz sollallohu alayhi vasallam bunday deganlar: “Agar ummatimga mashaqqat bo‘lmaganida, ularni har namozdan oldin misvok ishlatishga buyurgan bo‘lar edim” (Abu Dovud rivoyati).
Oisha onamiz roziyallohu anho shunday rivoyat qiladilar: “Rasululloh sollallohu alayhi vasallam misvok tutardilar, so‘ng uni yuvishim uchun menga berar edilar. Men avval u misvokni ishlatib, keyin yuvar edim va o‘zlariga qaytarib berardim” (Abu Dovud rivoyati).
Hanafiy fiqhi manbalarida ayollar misvok o‘rniga saqichdan foydalanishi mustahab ekani aytilgan: “Niyat bilan qilinsa, saqich misvokning o‘rnini bosadi. Chunki davomiy misvok ishlatish ayolning tishlarini zaiflashtiradi. Shu sababli (tishlarni poklash uchun) saqich ayol uchun mustahabdir (“Al-Bahr ar-roiq”, “Ar-Radd al-muhtor”).
Demak, tahoratda ayollar misvok, barmoqlari yoki zamonaviy tish tozalash vositalaridan foydalanishlari maqsadga muvofiqdir. Vallohu a’lam.
O‘zbekiston musulmonlari idorasi
Fatvo markazi.
Buxoroda ikki yangi jome masjidi qurilishi ko‘zdan kechirildi
Buxoro viloyatida yangi jome masjidlarini barpo etish va obodonlashtirish ishlari izchil davom etmoqda. Shu munosabat bilan O‘zbekiston musulmonlari idorasi Buxoro viloyati vakili, viloyat bosh imom-xatibi Jobir domla Elov Kogon shahri va Kogon tumanida qurilayotgan ikki masjidda bo‘lib, qurilish ishlarining borishi bilan tanishdi.
Dastlab Kogon tumanidagi “Xo‘ja Ka’bul Axbor Vali” jome masjidining yangi binosida olib borilayotgan qurilish ishlari ko‘zdan kechirildi. Tashrif davomida mas’ullar bilan qurilish jarayoni muhokama qilinib, ishlarni belgilangan muddatlarda va sifatli amalga oshirish yuzasidan tegishli tavsiya hamda takliflar berildi.
Loyihaga ko‘ra, yangi masjid xonaqohi va keng hovlisi bilan birgalikda 1000 nafardan ziyod namozxonni qabul qilish imkoniyatiga ega bo‘ladi. Majmua tarkibida muhtasham gumbaz, zamonaviy tahoratxonalar, ma’muriy binolar, yangi darvoza, avtoturargoh hamda ko‘kalamzorlashtirilgan hududlar barpo etiladi. Shuningdek, masjid hududidagi tarixiy hovuz va qadimiy quduqni restavratsiya qilish ishlari ham amalga oshirilishi rejalashtirilgan.
Shundan so‘ng Kogon shahrida barpo etilayotgan “Hazrati Bilol” jome masjidida ham qurilish ishlarining borishi o‘rganildi. Mas’ullarga qurilish sifatini yanada oshirish, me’moriy yechimlarga alohida e’tibor qaratish va ishlarni o‘z vaqtida yakunlash bo‘yicha tegishli ko‘rsatmalar berildi.
Loyihaga muvofiq, mazkur masjid sharqona milliy me’moriy uslubda qurilib, 900 nafar namozxonga mo‘ljallanadi. Majmuada kutubxona, omborxona, 20 kishilik tahoratxona, ma’muriy xonalar, baland gumbaz, ikki peshtoqli kirish darvozasi hamda balandligi 33 metr bo‘lgan minora barpo etiladi. Shuningdek, avtoturargoh, hovuz va yashil hududlar tashkil etilishi rejalashtirilgan.
Qayd etilganidek, qurilish ishlari masjidlarning hisob raqamlariga tushayotgan mablag‘lar hamda saxovatpesha homiylarning xayriyalari asosida amalga oshirilmoqda.
Yangi masjidlar yurtimizda diniy-ma’rifiy muhitni yanada mustahkamlash, aholiga munosib ibodat sharoitlarini yaratish va milliy me’morchilik an’analarini asrab-avaylashga xizmat qilishi bilan ahamiyatlidir.
Alloh taolo ushbu xayrli bunyodkorlik ishlarini barakali qilib, ularning muvaffaqiyatli yakun topishini nasib etsin.
O‘zbekiston musulmonlari idorasi
Buxoro viloyati vakilligi
Matbuot xizmati
