Bugungi muammo va imkoniyatlar Turkiyadagi konferensiyada muhokama etiladi
Kelgusi oyda Istanbulda muhim konferensiya o‘tkazilishi rejalashtirilgan. Unda islom mamlakatlari yetakchilari, olimlar va ekspertlar zamonaviy muammolar va ularni hal qilish yo‘llarini muhokama qilishadi.
“IQNA” axborot agentligi “Anadolu”ga tayanib xabar qilishicha, ushbu konferensiyani Jahon hamdardlik va hamkorlik uyushmasi (Cihannuma) tashkil etmoqda. Tadbir 2024 yil 13-15 dekabr kunlari Istanbuldagi Halich universitetida bo‘lib o‘tadi.
Uyushma rahbari Reza Yurolmaz ta’kidlashicha, konferensiyaning maqsadi islom jamiyatlari uchun innovatsion yechimlar ishlab chiqish va zamonaviy muammolarni muhokama qilish uchun platforma ishlab chiqish, yo‘l xaritasini taklif qilishdir. U turli sohalar, jumladan, ta’lim, biznes, san’at va fuqarolik jamiyati vakillarini jalb qilish orqali siyosiy yetakchilar va keng jamoatchilik o‘rtasidagi uzilishni bartaraf etish muhimligini ta’kidladi.
Konferensiyada adolat, migratsiya, iqtisodiy rivojlanish, qashshoqlikni kamaytirish, raqamlashtirish, ruhiy salomatlik, musulmon ozchiliklarning ahvoli kabi muhim mavzular muhokama etiladi.
Shuningdek, oila, madaniyat, san’at va fuqarolik jamiyati masalalariga alohida e’tibor qaratiladi. Tadbirda munozara va ma’ruzalar o‘tkazilishi reja qilingan.
Tadbirda islom olamidagi 50 ga yaqin yetakchi va ekspertlar, shuningdek, Turkiyaning ko‘plab olimlari va fikr yurituvchilari qatnashishi kutilmoqda.
O‘zbekiston musulmonlari idorasi
Matbuot xizmati
“Em Insight”: Toshkentdagi xalqaro mediaforum islom sivilizatsiyasining zamonaviy qiyofasini namoyon etdi
Britaniyaning “Em Insight” jurnalida O‘zbekistonda bo‘lib o‘tgan “Islom sivilizatsiyasi: yangi nigoh, yangi kashfiyotlar” mavzusidagi xalqaro mediaforumga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, O‘zbekiston Islom sivilizatsiyasi markazi tomonidan tashkil etilgan “Islom sivilizatsiyasi: yangi nigoh, yangi kashfiyotlar” xalqaro mediaforumi xorijlik OAVda katta qiziqish uyg‘otgan.
Raqamli platformalar, sun’iy intellekt va axborot xurujlari avj olgan hozirgi zamonda ommaviy axborot vositalarining mamlakatlar, madaniyatlar va sivilizatsiyalar haqidagi tasavvurlarni shakllantirishdagi o‘rni tobora ortib bormoqda.
Maqolada ta’kidlanishicha, Al-Xorazmiy, Ibn Sino, Beruniy, Imom Buxoriy, Imom Termiziy va Mirzo Ulug‘bek kabi jahon ilm-fani rivojiga beqiyos hissa qo‘shgan buyuk mutafakkirlar yurti bo‘lmish O‘zbekiston bu kabi global muhokamalar uchun eng maqbul maydondir.
Qatarning “The Peninsula” gazetasi mas’ul muharriri Muhammad Osmon forumning raqamli axborot asridagi ahamiyatiga to‘xtalib, Imom Buxoriyning hadislarni to‘plash va ularning haqqoniyligini tekshirishdagi qat’iy yondashuvini tilga oldi.
U ushbu metodologiyani manbalarni chuqur o‘rganish va verifikatsiya qilishning o‘chmas namunasi deb atadi va bu tamoyillar feyk xabarlar hamda sun’iy intellekt mahsulotlari ko‘paygan hozirgi davrda juda ahamiyatli ekanini bildirdi.
O‘zbekiston Milliy axborot agentligi muharriri O‘tkir Alimov forumning Mustaqillikning 35 yilligi ostonasida o‘tkazilayotganiga e’tibor qaratgan. U 50 mamlakatdan 300 ga yaqin OAV vakillarining Toshkentda jamlangani O‘zbekistonning sivilizatsiyalar chorrahasi sifatidagi o‘rni ortib borayotganidan dalolat berishini ta’kidladi.
Maqolada Toshkentdagi xalqaro mediaforum jurnalistika mas’uliyati, tarixiy tadqiqotlar chuqurligi va zamonaviy texnologiyalar imkoniyatlarini birlashtirgan holda Islom sivilizatsiyasini yangi, zamonaviy qiyofada dunyoga tanitishga xizmat qilishi bayon etilgan.
O‘zbekiston musulmonlari idorasi Matbuot xizmati
