Kechasi ko‘chada yurishning zararlari
Ushbu hadisi sharifda Rasululloh sollalloh alayhi vasallam kechasi yolg‘iz yurishdan qaytarmoqdalar. Chunki uning bir qancha zararlari bor, ammo odamlar ularning hammasini ham anglab yetmaydilar. Shu sababli, Rasululloh sollallohu alayhi vasallam insonlar bilmagan yomonliklarni bilganlari uchun undan ogohlantirmoqdalar.
Bugungi kunda ota-ona nazorati va e’tiborisiz qolgan juda ko‘plab yoshlarning ushbu hadisga amal qilmay, kechasi bilan ko‘chalarda, kafe-bar, internet klublarda sang‘ib yurishlari, tongga qadar vaqtlarini behuda va bekorchi ishlarga sarflashlari kuzatilmoqda.
Eng xavfli va ayanchli jihati – yarim tunda bunday ko‘cha daydishlarning oxir-oqibati turli jinoyatlar, qotilliklar, mushtushzo‘rliklar bilan yakun topmoqda. Qolaversa, turli ruhiy kasalliklarga duchor bo‘lganlarning aksariyati aynan bemahalda ko‘chada sang‘ib yurganlar tashkil etishini unutmaslik kerak.
Demak, shariat ko‘rsatmasiga amal qilgan banda dunyo va oxirati uchun foydali bo‘lgan amallarga yaqin, noxush va zararli holatlardan esa uzoq bo‘ladi. Alloh taolo O‘zining roziligini topadigan solih amallarda bardavom qilsin!
Davron NURMUHAMMAD
Shayx hazratlarining kitoblari Masjidi Nabaviyda
Fazilatli shayx Muhammad Sodiq Muhammad Yusuf hazratlari qoldirgan boy ilmiy merosi nafaqat O‘zbekistonda, balki dunyoning turli nuqtalarida, xususan, Islom olamining tabarruk maskani bo‘lmish Masjidi Nabaviy kutubxonasida ham saqlanib kelyapti.
2017 yilda shayx hazratlarining bir qator kitoblari ilk bor Masjidi Nabaviy kutubxonasiga taqdim etilgan edi. Shundan buyon ziyoratga borgan hamyurtlarimiz ushbu kutubxonadan hazratning asarlarini o‘z ona tilimizda mutolaa qilish imkoniyatiga ega bo‘lib kelishyapti.
Masjidi Nabaviy kutubxonasi masjidning 10-eshigi yonida joylashgan. Kutubxonada 170 000 dan ortiq kitob saqlanadi. Asosiy adabiyotlar arab tilida bo‘lsada, 20 dan ortiq xorijiy tillardagi diniy manbalar ham jamlangan. Kutubxonadan bir vaqtning o‘zida 300 dan ortiq kitobxon foydalanishi mumkin.
Kutubxonada xorijiy tillardagi adabiyotlar uchun alohida xona ajratilgan. U yerda ingliz, rus, fransuz kabi jahon tillari qatorida o‘zbek tili bo‘limi ham bor. Ushbu bo‘limda shayx Muhammad Sodiq Muhammad Yusuf hazratlarining qalamlariga mansub 50 dan ortiq asar bor. Jumladan:
– «Hadis va Hayot» silsilasi;
– «Tafsiri Hilol»;
– «Kifoya»;
– «Ruhiy tarbiya»;
– «Zikr ahlidan so‘rang»;
– «Odoblar xazinasi»;
– «Xislatli hikmatlar sharhi»;
– «Baxtiyor oila» va boshqalar.
@islomuz
