Istig‘fordan keyin qanday duo qilinadi?
Cavol: 100 marta astag‘firulloh aytgandan keyin qanday duo qilinadi?
Javob: Bismillahir Rohmanir Rohiym. Istig‘for, shu kabi salavot va tasbehlardan keyin muayyan bir duoni o‘qish buyurilmagan. Lekin duo ayni ibodat sanaladi. Uni har qanday munosib holatlarda qilish joiz. Jumladan, savobli amallar: namoz, ro‘za, zikru tasbehlar kabi ibodatlardan keyin duo qilinsa, ijobatga yaqin bo‘ladi. Istasa ushbu zikru tasbehlarining savobini kimgadir bag‘ishlaydi.
Demak, istig‘for va zikru tasbehlardan keyin duo qilish shart emas, lekin duo qilmoqchi bo‘lsa, bunga mone’lik yo‘q. Duo qilgani uchun alohida savob oladi. Vallohu a’lam.
O‘zbekiston musulmonlari idorasi
Fatvo markazi.
Aholi bilan ochiq muloqot: murojaatlar yechim topmoqda
O‘zbekiston musulmonlari idorasi tomonidan aholi bilan yo‘lga qo‘yilgan ochiq va samimiy muloqot tizimi fuqarolarning murojaatlarini atroflicha o‘rganish hamda ularga tezkor yechim topishda muhim omil bo‘lmoqda.
12 avgust kuni Diniy idora raisi o‘rinbosari Zayniddin domla Eshonqulov navbatdagi fuqarolar qabulini o‘tkazib, yurtdoshlarimizning arz, taklif va murojaatlarini tingladilar. Yuzma-yuz suhbat jarayonida masjidlar holati va faoliyati, imom-xatiblar ishi, Haj va Umra ziyoratlarini tashkil etish, oilaviy munosabatlarni tartibga solish hamda moddiy yordam ko‘rsatishga oid ko‘plab masalalar chuqur tahlil qilinib, ularning aksariyati joyida ijobiy hal etildi.
Eslatib o‘tamiz, bu kabi qabullar va fuqarolar bilan muloqot tadbirlari Diniy idoraning hududiy vakilliklari hamda yurtimizdagi barcha jome masjidlarda har haftaning chorshanba kuni imom-xatiblar tomonidan o‘tkazib kelinmoqda.
O‘zbekiston musulmonlari idorasi
Matbuot xizmati
