Arab tili bilimdonlari aniqlandi
Toshkent islom institutida “Yanvar – Arab tili va balog‘at” fanlari oyligi hamda "18 dekabr – Xalqaro arab tili kuni" munosabati bilan talabalar o‘rtasida “Tillar” kafedrasi tomonidan musobaqa tashkil etildi.
- Ishtirokchilar quyidagi 6 ta shart bo‘yicha o‘zaro bellashdilar:
- Arab tili va balog‘atdan blis savollarga javob berish;
- Kalimaning oxirgi harfiga ko‘ra so‘z aytish;
- Berilgan suratlarni arab tilida ta’riflash va javobini topish;
- Sahna ko‘rinishlari namoyishi;
- O‘zbekcha iboralarni arab tiliga tarjima qilish;
- Arab tilidagi zarbul masallarni aytib, sharhlash.
Musobaqa har yilgidek qizg‘in va yuqori saviyada o‘tdi. Ayniqsa, sahna ko‘rinishlari talabalarning ijodkorligini va arab tiliga bo‘lgan qiziqishini yorqin namoyon etdi hamda tomoshabinlarda katta taassurot qoldirdi.
Arab tilini bilish Qur’oni karim ma’nolarini anglashga, ilm-fan, tarix va xalqlar madaniyatlarini o‘rganishga olib boruvchi yo‘ldir.
Musobaqada quyidagi natijalar qayd etildi:
1-o‘rin: Sakkokiy jamoasi (3-kurs talabalari);
2-o‘rin: Zamaxshariy jamoasi (1-kurs talabalari);
3-o‘rin: Mulla Jomiy jamoasi (2-kurs talabalari).
Musobaqa talabalarning bilimlarini yanada rivojlantirishga xizmat qildi. G‘oliblarga esdalik sovg‘alari va maqtov yorliqlari topshirildi.
Arab tili nafaqat diniy ilmlarni o‘rganish, shu bilan birga dunyo madaniyatlari, ilm-fan va tarixga yo‘l ochuvchi tillardan biridir. Bu kabi tadbirlar talabalarga bilimlarini amalda qo‘llash imkoniyatini berib, ularning ijodiy qobiliyatlarini oshiradi.
Imom Buxoriy nomidagi Toshkent Islom instituti
Matbuot xizmati
Akademiya rektori «Do‘stlik», Islom sivilizatsiyasi markazi direktori «Fidokorona xizmatlari uchun», akademiya professori «Imom Buxoriy» ordenlari va «Ziyo» media markazi rahbari «Shuhrat» medali bilan taqdirlandilar
O‘zbekiston Respublikasi Prezidentining farmoniga muvofiq, O‘zbekiston Respublikasi davlat mustaqilligining o‘ttiz besh yilligi munosabati bilan turli sohalar vakillari faxriy unvonlar, ordenlar va medallar bilan mukofotlandilar.
Xususan, O‘zbekiston Respublikasi Prezidentining diniy-ma’rifiy masalalar bo‘yicha maslahatchisi, O‘zbekiston xalqaro islomshunoslik akademiyasi rektori Kamilov Muzaffar Muratovich "Do‘stlik" ordeni bilan, O‘zbekistondagi Islom sivilizatsiyasi markazi direktori Abduxalikov Firdavs Fridunovich «Fidokorona xizmatlari uchun» ordeni bilan, mazkur akademiyaning "Arab tili va adabiyoti al-Azhar" kafedrasi professori Islomov Zohidjon Mahmudovich «Imom Buxoriy» ordeni bilan va akademiya huzuridagi "Ziyo" media markazi direktori Muxtarov Abduxamid Abduaxatovich "Shuhrat" medali bilan taqdirlandilar.
O‘zbekiston musulmonlari idorasi jamoasi doimiy hamkor tashkilotlarimiz rahbarlari va ustozlarni mazkur yuksak mukofotlar bilan muborakbod etib, Alloh taolodan mamlakatimiz taraqqiyoti, xalqimiz farovonligi va muborak dinimiz rivoji yo‘lidagi faoliyatlarida yangidan-yangi muvaffaqiyatlar tilaymiz.
O‘zbekiston musulmonlari idorasi Matbuot xizmati
