MASKAT, 18 dekabr. /"Dunyo" AA/. O‘monning "Asdaa Oman" elektron gazetasida O‘zbekistonning zamonaviy madaniyatiga bag‘ishlangan maqola e’lon qilindi, deb xabar qilmoqda "Dunyo" AA muxbiri.

Maqolada milliy san’atni asrab-avaylash, yosh avlodni uning go‘zalligida tarbiyalash va madaniyatni rivojlantirish ijtimoiy hayotning ajralmas qismi sifatida O‘zbekiston taraqqiyotining asosiy elementlari ekanligi ta’kidlanadi.

Madaniyat va san’at sohasidagi ta’limni rivojlantirish, professional ta’lim tizimini takomillashtirish hamda ushbu omillarning jamiyat ma’naviy uyg‘unligini ta’minlashga ta’siri haqida ma’lumotlar keltirilgan.

O‘zbek xalqining boy madaniy merosini asrab-avaylash va kelgusi avlodlarga yetkazish maqsadida zamonaviy texnologiyalar joriy etilayotgani ta’kidlandi. Xususan, madaniy meros elementlarini raqamlashtirish, ilmiy tadqiqotlarni kengaytirish va targ‘ibotni kuchaytirish borasidagi sa’y-harakatlar xalqaro hamkorlikning asosiy yo‘nalishlariga aylangani e’tirof etilgan.

"Bu nafaqat zaruriyat, balki oliy maqsad hamdir - ushbu jarayonning ijobiy tomonlaridan foydalanish va o‘zbek madaniyatining o‘ziga xos xususiyatlarini jahon maydonida namoyish etish millat taraqqiyotining muhim mezoniga aylanadi", - deya xulosa qiladi "Asdaa Oman" gazetasi.