Faxriylar kengashining kelgusi faoliyati muhokama qilindi
Shu yil 16 dekabr kuni O‘zbekiston musulmonlari idorasida Faxriylar kengashining navbatdagi majlisi bo‘lib o‘tdi. Unda Faxriylar kengashi yangi tarkibini tasdiqlash, kengashning hududlardagi bo‘linmalarini tashkil etish, kengash faoliyatini yanada kuchaytirish va bir qancha masalalar ko‘rib chiqildi.
Dastlab O‘zbekiston musulmonlari idorasi tizimida mehnat qilayotgan va nafaqa yoshidagi faxriylarni davlat mukofotlariga tavsiya etish masalasi muhokama qilindi. Yakunda kengash a’zolaridan munosib nomzodlar tavsiya etilib, ishtirokchilar tomonidan bir ovozdan qo‘llab-quvvatlandi.
Yig‘ilish davomida Faxriylar kengashi raisi Shayx Abdulaziz Mansur so‘zga chiqib, kengashi tarkibiga Namangan viloyati vakilligi tizimida uzoq yillar xizmat qilgan ulamo Abdulhay domla Tursunov nomzodini kiritishni tavsiya qilib, u kishining dinimiz ravnaqi yo‘lidagi xizmatlarini e’tirof etdilar. So‘ngra Faxriylar kengashi a’zoligiga Abdulhay domla Tursunov nomzodi tasdiqlandi.
Shuningdek, Faxriylar kengashining hududlardagi bo‘linmalarani tashkil etish masalasi muhokama qilinib, viloyatlarda ham dinimiz ravnaqiga munosib xissa qo‘shib kelayotgan ulamolar salmoqli ekani qayd etildi. Ushbu loyihaning ishga tushirilishi hududlarda mehnat qilayotgan ko‘plab faxriy imom-xatiblar va din peshvolarini uchun manfaatli bo‘lishi ta’kidlandi.
Yig‘ilishda Faxriylar kengashi a’zolari yil davomida diniy ta’lim muassasalariga tashrif buyurib, talabalar bilan uchrashuvlar o‘tkazgani, bu tinglovchilarda katta taassurotlar qoldirgani ta’kidlanib, kelgusida bunday suhbatlarni ko‘paytirish va Faxriylar kengashi faoliyatini yanada jadallashtirish lozimligiga urg‘u qaratildi.
Majlis yakunida mazkur masalalar yuzasidan tegishli qarorlar qabul qilindi.
O‘zbekiston musulmonlari idorasi
Matbuot xizmati
Zeki Kaymaz: Kelgusi o‘n yil ichida O‘zbekistonni turkiy dunyoda yorqin yulduz sifatida ko‘raman
Turk tili instituti Ilmiy kengashi a’zosi, filolog olim, professor Zeki Kaymaz O‘zbekiston mustaqilligining 35 yilligi arafasida “Dunyo” AA orqali yurtdoshlarimizga o‘zining samimiy tabrigi va ezgu tilaklarini yo‘lladi.
– Avvalo, O‘zbekiston xalqini istiqlolning 35 yilligi munosabati bilan chin ko‘ngildan tabriklayman. O‘ttiz besh yil oz vaqt emas. Men yuz yildan oshgan mustaqil Turkiya fuqarosi sifatida Sizlarga ham yana ko‘p asrlar mustaqillik shodiyonasini nishonlashingizni tilayman.
Tarixga nazar tashlasak, Markaziy Osiyo, xususan, O‘zbekiston bilan yaqin munosabatda bo‘lib kelganmiz. Ayniqsa, Turkiyadagi milliy ozodlik kurashi davrida bizga bu diyordan jo‘natilgan ko‘makni doimo katta minnatdorlik bilan yodga olamiz.
Qardosh o‘zbek xalqi biz uchun doimo yaqin birodar, qalin do‘st bo‘lib kelgan. O‘zbekistonning bugungi taraqqiyoti bizni juda mamnun qiladi. Ushbu zaminga har borganimda go‘zal va obod mamlakatni ko‘ramaz. Yurtingizda madaniyat va ma’rifat o‘choqlari bisyor. Albatta, bu tamaddun va sivilizatsiyaning ildizlari uzoq o‘tmishga borib taqaladi.
Markaziy Osiyodagi ilk o‘rta asrlardagi Birinchi renessans hamda Amir Temur asos solgan Ikkinchi renessans davrlarida bu zaminda buyuk sivilizatsiya shakllandi. Toshkentda bunyod etilgan Islom sivilizatsiyasi markazi, Samarqanddagi Imom Buxoriy majmuasi, Imom Moturidiy ziyoratgohi kabi madaniy-ma’naviy maskanlar islom olamida muhim ahamiyatga ega.
Geostrategik mavqei nuqtayi nazaridan, men kelgusi o‘n yil ichida O‘zbekistonni turkiy dunyo, xususan, Markaziy Osiyo davlatlari orasida yorqin yulduz sifatida ko‘raman.
Buning sabablari bor, albatta. Avvalo, mamlakatdagi kuchli iqtisodiyot. Qolaversa, chuqur ildizlarga ega bo‘lgan boy madaniyat va tarix. Turkiya bilan O‘zbekiston o‘rtasidagi mustahkam do‘stlik va yaqin hamkorlik aloqalari ham muhim ahamiyat kasb etadi.
Tilagim – do‘stlik rishtalarimiz yanada mustahkamlansin, davlatlarimiz o‘rtasidagi hamkorlik aloqalari yuqori darajaga ko‘tarilsin.
Yana bir bor mustaqillik bayrami bilan chin qalbimdan tabriklayman va o‘zbek xalqiga samimiy salomlarimni yo‘llayman.
O‘zbekiston musulmonlari idorasi Matbuot xizmati
