Qo‘ng‘irot tumani imom-xatiblari bilan tadbir tashkil etildi
Qoraqalpog‘iston musulmonlari qoziyoti qozisi Bahramatdin domla Razov boshchiligida Qoraqalpog‘iston musulmonlari qoziyoti xodimlari, qozi o‘rinbosari Djolaushiyev, Nukus shahri bosh imomi Nabatov, Shumanay tumani bosh imomi Amedov, Qanliko‘l tumani bosh imomi Naimov va Qo‘ng‘irot tumani hojilaridan iborat guruh tuzilib, Qo‘ng‘irot tumanidagi "Hakim Sulaymon" va "Mulla Is'hoq" masjidlarining faoliyatini o‘rganish, imom-xatiblar bilan tajriba almashish, ularga ko‘rsatmalar berish maqsadida tadbir o‘tkazildi.
Tadbirda masjid joylashgan mahallalarda yashovchi muammoli, ehtiyojmand oilalar, nogironligi bo‘lgan fuqarolar holidan xabar olish, ularga moddiy va amaliy yordamlar berish ham belgilangan.
Tadbirdan so‘ng "Hokim Sulaymon" masjidining yangi qurib bitkazilgan tahoratxonasidagi sharoitlar bilan tanishdi va qurilish ishlarida yaqindan yordam bergan quruvchilarga qozi domla Bahramatdin domla qozilik nomidan tashakkur bildirdi.
Ishchi guruh a’zolari tumandagi "San’at, Adabiyot, Navoiy, Qiyot, Temir yo‘l, Qumbuz, Oltin ko‘l" mahallalaridagi jami 13 ta oilaning yashash sharoitlaridan xabardor bo‘ldi, oila a’zolari bilan suhbatlashib, moddiy yordamlar berdi.
Bosh imomlar tumandagi masjidlarda amalga oshirilgan tozalash, obodonlashtirish, kuz-qish mavsumiga tayyorgarlik ishlari, masjidlarda ish yuritish hujjatlarining qonun talablariga muvofiqligini ko‘zdan kechirdi, kamchiliklarni to‘ldirish uchun ko‘rsatmalar berdi.
Bahramatdin domla Razov markaziy "Hakim Sulaymon" masjidida, Nukus shahri bosh imomi Nabatov "Mulla Is'hoq" masjidida peshin namozida "Masjid odobi", "Tinchlik va xotirjamlik", "Millatlararo totuvlik" mavzularida ma’ruza qildi.
Qoraqalpog‘iston musulmonlari qoziyoti Matbuot xizmati
Malayziya telekanalida O‘zbekistonning ziyorat turizmi imkoniyatlari keng yoritildi
Malayziyaning “Berita RTM” telekanalida O‘zbekistonda ziyorat turizmi sohasida amalga oshirilayotgan islohotlarga bag‘ishlangan maxsus dastur namoyish etildi, deb xabar bermoqda “Dunyo” AA.
Mamlakatimiz mustaqilligining 35 yilligi arafasida efirga uzatilgan ushbu ko‘rsatuvda malayziyalik professorlar – Badrul Isa va Norfadilah Kamaruddin tomonidan ishlab chiqilgan “O‘zbekiston–Malayziya: kreativ turizm” nomli loyiha taqdim etildi.
Olimlar tashabbusi bilan yaratilgan mazkur loyiha mamlakatimizning Malayziyadagi elchixonasi, Turizm qo‘mitasi va Islom sivilizatsiyasi markazi hamkorligida amalga oshirildi.
Tashabbus O‘zbekistonning turizm imkoniyatlari haqida “Visual storytelling” formatida professional raqamli kontent yaratishni nazarda tutadi.
Loyihaga ko‘ra, 17–31 avgust kunlari Malayziya UiTM texnologiya universitetining professional fotograflari va dizaynerlaridan iborat ijodiy jamoa Toshkent, Samarqand, Buxoro va Xorazmda suratga olish ishlarini olib boradi.
Malayziyalik ijodkorlar yurtimiz haqida tayyorlagan foto va videomateriallar “Instagram”, “Facebook”, “TikTok”, “YouTube” kabi internet platformalarda joylashtirilishi rejalashtirilgan. Loyihada yurtimiz oliy o‘quv yurtlarining dizayn, san’at, turizm va mehmonxona biznesi yo‘nalishidagi talabalari ham ishtirok etadi. Bu akademik, turizm va ijodiy sohalarda tajriba almashishni tashkil etish imkonini beradi.
Dasturda fikr bildirgan Badrul Isa loyiha ASЕAN mamlakatlari va musulmon olamida O‘zbekistonni yanada kengroq tanitishga xizmat qilishini ta’kidladi. Uning fikricha, raqamli platformalar orqali mamlakatimiz tarixiy merosi, ziyorat turizmi va amalga oshirilayotgan so‘nggi o‘zgarishlari keng yoritiladi.
“Biz boy tarixiy meros, yuksak madaniyat va mehmondo‘st xalqqa ega bo‘lgan O‘zbekistonni ASЕAN mintaqasi aholisi tomonidan qayta kashf etilishini istaymiz”, – dedi professor.
Shuningdek, u O‘zbekiston xalqini mustaqillikning 35 yilligi bilan tabriklab, loyiha natijalari ushbu sanaga munosib sovg‘a bo‘lishini qayd etdi.
Ushbu tashabbus O‘zbekistonning ziyorat turizmini ommalashtirish va ASЕAN mamlakatlaridan ko‘proq sayyohlarni jalb qilishga xizmat qilishi kutilmoqda.
O‘zbekiston musulmonlari idorasi Matbuot xizmati
- «
- »