Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

Oxiratni o‘ylab o‘tiribman

Yusuf ibn Asbot aytadi: «Masjidda edim. Sufyon Savriy menga: «Ey Yusuf, tahorat qilishga toza suv olib kelgin», dedilar. Suvni mendan o‘ng qo‘l bilan olib, chap qo‘llarini yuzlariga qo‘yib, o‘yga tolib qoldilar. Shu orada uxlab qolibman. Tursam, tong otib qolibdi. Sufyon Savriy rahmatullohi alayhga qarasam, qo‘llaridagi suv o‘sha holicha turibdi. Shunda u zotga: «Ey Abu Abdulloh, tong otdi», dedim. U zot: «Menga suvni olib kelganingdan beri oxiratni o‘ylab o‘tiribman», dedilar».

Shundan boshqa narsam yo‘q

Hajjojdan rivoyat qilinadi: «Sho‘ba eshagini minib ketayotgan edi, Sulaymon ibn Mug‘irani uchratib qoldi. U Sho‘baga (muhtojligidan) shikoyat qildi. Sho‘ba esa: «Allohga qasamki, shu eshakdan boshqa narsam yo‘q», dedi. Keyin eshakdan tushib, uni Sulaymonga berib yubordi».

Onaga ehtirom

Ashjaiy aytadi: «Bir kuni kechasi Mis’ar ibn Kidomning onasi suv so‘radi. Lekin Mis’ar idishda suv olib kelgunicha onasi uxlab qolibdi. U tonggacha idishni qo‘lida ko‘tarib turdi».

Ahmad Muhammad Tursun rahimahulloh