Qur’oniy madaniyat bo‘yicha “at-Tahbir” mukofotining o‘n birinchi mavsumi Birlashgan Arab Amirliklari ichki ishlar vaziri Sayf bin Zayd an-Nahayyon boshchiligida o‘z faoliyatini boshladi.

IQNA axborot agentligi BAAning “al-Ayn” axborot portaliga asoslanib xabar berishicha, “at-Tahbir” mukofotining Qur’on fanlari bo‘yicha mas’ul kotibi Umar Xabtur ad-Dari tanlovlar virtual shaklda o‘tkazilishi va u har bir yosh toifasi uchun mo‘ljallanganini ta’kidladi.

Tanlov doirasida Qur’on qiroati, tajvid, eng chiroyli tartiliy qiroat, Qur’on tushunchalari, azon, ommaviy chiqishlar, madaniy tanlovlar, oila qadriyatlari kabi ko‘rik-tanlovlar tashkil qilingan.

Ushbu yil tanlovga “Oila qadriyatlari” nomli yangi rukndagi tanlov qo‘shilgani qayd etildi. Ad-Dari bunday dedi: “At-Tahbir” mukofoti milliy o‘zligimizni mustahkamlash hamda farzandlarni Qur’on ta’limiga qiziqtirish, to‘g‘ri qadriyatlar va odoblarni targ‘ib qilish, ekstremizmga qarshi kurashish, o‘zaro hurmatni qaror toptirish va har bir shaxsning jamiyatdagi mas’uliyatli fuqaro sifatidagi o‘rnini shakllantirishga qaratilgan platforma tayyorlaydi”.

O‘zbekiston musulmonlari idorasi
Matbuot xizmati