Ehtiyojmandlarga “Ramazon hadyasi” ulashildi
Ramazonni shukuhli kunlarida kishilar qalbiga quvonch ulashishi xayrli amallardan sanaladi. Ayniqsa, ehtiyojmand, etim, beva-bechora va jismoniy imkoniyati cheklangan insonlarni xursand qilish, ularga mehr-muruvvat, hadyalar taqdim etish nihoyatda savobli ishdir.
Bugun mamlakatimiz bo'ylab bunday saxovat ishlari keng quloch yoydi.
Shu kunlarda Samarqand viloyat bosh imom-xatibi Zayniddin domla Eshonqulov tashabbusi bilan Samarqand shahar “O'zbekkenti” MFYda joylashgan, “Kelajak vorislari” nomidagi oilaviy bolalar muruvvat uyida ularning qalbida xursandchilik va baxtiyorlik hissini uyg'otish maqsadida iftorlik dasturxoni tashkil qilindi. Unda Samarqand shahar va Oqdaryo tumanlaridan kelgan 19 nafar o'g'il-qizlar va ularning vasiylari ishtirok etdi.
Tadbirda ishtirok etayotgan har bir oilaviy bolalar muruvvat uylari tarbiyalanuvchilari hamda vasiylik va homiylikka olingan bolalarga televizor qurilmasi hamda boshqa ehtiyoji bor buyumlar “Ramazon hadyasi” sifatida topshirildi.
Bunday xayriya ishlari Samarqand shahar “Imom Vose” va “Zominiy” MFYlarda davom etdi. U erda yashovchi, kam ta'minlangan oilalardan xabar oliindi. Iftorlik dasturxonida Zayniddin domla yig'ilganlarga “Ramazon oyining barakoti va fazilatlari” hamda “Sabr qiluvchilarga Alloh taolodan ulkan ajrlar bor” mavzularida ma'ruza qildi. Shu bilan birga xonadon egalariga “Ramazon hadyalari”ni topshirdi.
Shu kunlarda viloyatdagi boshqa hududlarda ham faoliyat olib borayotgan imom-xatiblar tomonidan aholining 100 ga yaqin nogironligi bor, kam ta'minlangan, bemor, boquvchisini yo'qotgan holidan xabar olinib, ularga “Ramazon hadya”lari ulashildi.
O'zbekiston musulmonlari idorasi Matbuot xizmati
Samimiy muloqot – muammolar yechimiga yo‘l
O‘zbekiston musulmonlari idorasi rahbariyatining aholi bilan ochiq va samimiy muloqotlari fuqarolar murojaatlarini o‘rganish hamda ularni hal etishda muhim ahamiyat kasb etmoqda.
Bugun, 16 sentyabr kuni O‘zbekiston musulmonlari idorasi raisining birinchi o‘rinbosari Homidjon domla Ishmatbekov Diniy idoraga kelgan bir guruh fuqarolarni qabul qilib, ularning murojaat, arz va takliflarini tingladilar.
Muloqot davomida imomlar faoliyatini yanada takomillashtirishga oid takliflar ko‘rib chiqildi. Shuningdek, ustozdan xayrli duo olish niyatida kelganlar, o‘zlari yozgan kitoblarini taqdim etganlar ham bo‘ldi. Moddiy yordam so‘rab murojaat qilgan fuqarolarga esa belgilangan tartibda tegishli ko‘mak ko‘rsatildi.
Samimiy qabul va ko‘rsatilgan e’tibordan mamnun bo‘lgan fuqarolar minnatdorlik bildirib, xayrli duolar qilishdi.
Darhaqiqat, inson dardiga sherik bo‘lish, uning tashvishini yengillatish — savobi ulug‘ amaldir.
Rasululloh sollallohu alayhi va sallam marhamat qilganlar:
«Kim birodarining hojatini ravo qilsa, Alloh uning hojatini ravo qiladi. Kim bir musulmonning tashvishini aritsa, Alloh uning Qiyomat kunidagi tashvishlaridan birini aritadi» (Imom Buxoriy rivoyati).
Eslatib o‘tamiz, bunday qabullar O‘zbekiston musulmonlari idorasining hududiy vakilliklari hamda barcha jome masjidlarida har chorshanba kuni imom-domlalar tomonidan muntazam o‘tkazib kelinmoqda.
O‘zbekiston musulmonlari idorasi
Matbuot xizmati
