Har bir xonadonga kirib borilyapti
Kuni kecha O‘zbekiston musulmonlari idorasi raisi o‘rinbosari Zayniddin domla Eshonqulov boshchiligida Bekobod shahridagi «No‘mon ibn Sobit» jome masjidida ma’naviy-ma’rifiy yig‘ilish o‘tkazildi.
Unda O‘zbekiston musulmonlari idorasi mas’ullari, Toshkent viloyati bosh imom-xatibi o‘rinbosari Ziyovuddin domla Nortojiyev, vakillik xodimlari, tuman bosh imom-xatibi va otinoyilari, shuningdek, otinoyilar, “Haj – 2024” ziyoratchilari, mahallalar raislari ishtirok etdi.
So‘ngra hududdagi oilalarga kirilib, ehtiyojmand, boquvchisini yo‘qotgan, kam ta’minlangan oilalar holidan xabar olindi. Ayrim sabablarga ko‘ra arazlashib qolgan oilalar yarashtirildi.
Jismoniy imkoniyati cheklangan ikki fuqaroga "Vaqf" xayriya jamoat fondi tomonidan nogironlik aravachasi, hassalar va boshqa zarur vositalar yetkazib berildi.
Tuman imom-xatiblari tashabbusi bilan xonadonlarga diniy-ma’rifiy, ma’naviy-axloqiy mavzulardagi kitoblar, xususan, Qur’oni karim, O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining «Fitna – ko‘z ilg‘amas xatar», «Alloh meni ko‘rib turibdi», «Tasadduq, yo Rasululloh», «Rabboniy nidolar», O‘MI Fatvo markazi nashrga tayyorlagan «Fiqh va aqoidga oid ixtilofli masalalar yechimi», «Fatvolar to‘plami» hamda Shayx Muhammad Sodiq Muhammad Yusuf rahimahullohning «Baxtiyor oila» kabi asarlari hadya qilindi.
Alloh taolo xayrli ishning boshida turgan barcha azizlarimizdan rozi bo‘lsin!
Toshkent viloyati vakilligi
Matbuot xizmati
Sayyid Yahyo Bokuviy merosiga bag‘ishlangan xalqaro konferensiya bo‘lib o‘tmoqda
Boku shahrida Turkiy davlatlar muftiylari yig‘ilishi doirasida ulug‘ mutafakkir, tasavvuf olimi Sayyid Yahyo Bokuviy merosiga bag‘ishlangan xalqaro konferensiya o‘z ishini boshladi.
Ushbu nufuzli tadbirda Turkiy davlatlar tashkiloti, Butunjahon musulmon donishmandlar kengashi, IRCICA, ICESCO, Al-Azhar ulamolar kengashi vakillari hamda yetuk sharqshunos va islomshunos olimlar ishtirok etmoqda.
Anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ma’ruza qildilar.
Muftiy hazratlari Sayyid Yahyo Bokuviyning tasavvuf tarixidagi maqomi va uning ta’limoti haqida to‘xtaldilar. Shuningdek, nutqda alloma nafaqat tasavvuf, balki diniy ilmlar, tabiiy va aniq fanlarni egallagan qomusiy olim bo‘lgani, o‘ttizga yaqin asarlari inson nafsini tarbiyalashda muhim qo‘llanma ekani ta’kidlandi.
Shayx Nuriddin Xoliqnazar hazratlari Qur’oni karim va hadisi shariflarga tayangan holda qalb salomatligi va pokligi inson hayotining bosh mezoni ekanini bayon etib, turkiy xalqlarni bog‘lab turgan umumma’naviy ildizlarga alohida urg‘u berdilar:
«Hazrat Ahmad Yassaviy, Bahouddin Naqshband va Sayyid Yahyo Bokuviy kabi buyuk zotlar ilgari surgan nafs tarbiyasi, insonparvarlik va yuksak axloq g‘oyalari bugun ham qardosh xalqlarimizni birlashtirib turuvchi mustahkam ma’naviy ko‘prikdir. Bunday ulug‘ siymolar merosini hamkorlikda o‘rganish xalqlarimizning ma’naviy birligini mustahkamlash va yoshlarimizni sog‘lom e’tiqod ruhida tarbiyalashga xizmat qiladi».
Uch kunlik anjuman davomida O‘zbekiston ilmiy jamoatchiligi ham ma’ruzalar bilan ishtirok etadi.
O‘zbekiston musulmonlari idorasi Matbuot xizmati
