Bir hadis sharhi: Agar Alloh taolo bandasini yaxshi ko‘rsa
Abu Hurayra roziyallohu anhudan rivoyat qilinadi. Rasululloh sollalohu alayhi vasallam aytdilar: “Mo‘min va mo‘minaga o‘zi, farzandi va mol-dunyosi borasida doim musibat yetib turadi (bular gunohlarni o‘chirib turaverganidan) hatto Alloh taologa zimmasida biror gunohsiz holatda yo‘liqadi” (Imom Termiziy rivoyat qilgan).
Hadis sharhi: Alloh taolo bandalarini musibat va balolar bilan sinashni ularning gunohlariga kafforat va xatolari o‘chirilishi uchun joriy qildi. Buning sababi Alloh taolo bandasini yaxshi ko‘rar ekan, gunohlarini mag‘firat qilish uchun uni sinaydi. Natijada banda Alloh taologa zimmasida biror gunohsiz yo‘liqadi.
Bu hadisda Rasululloh sollallohu alayhi vasallam “Mo‘min va mo‘minaga doim musibat yetib turadi” ya’ni: mo‘min banda balolardan ajramasdan doim musibatda bo‘lib, unga sinovlar tushishi bardavom bo‘ladi, “o‘zida” ya’ni: ruhiy va jismoniy sog‘lig‘ida, “farzandida”, ya’ni: farzandlarining kasal bo‘lishi, vafoti, oq bo‘lishi va boshqalarda, “molu dunyosida”, ya’ni: kambag‘allik, tijoratini kasodga uchrashi va rizq-ro‘zg‘oridagi qiyinchiliklarda bo‘ladi, “hatto Alloh taologa zimmasida biror gunohsiz holatda yo‘liqadi” dedilar, ya’ni Alloh taolo bandadan bu sinovlar sababli barcha gunoh va xatolarini kechiradi va banda Alloh taologa qilgan barcha gunoh va xatolaridan pok holatda yo‘liqadi. Bunday bandalarga qiyomat kunida go‘zal mukofot bo‘ladi.
Payg‘ambarimiz sollallohu alayhi vasallam bunday deganlar: “Bu dunyodagi ofiyatda yashaganlar dunyoda musibatlar bilan sinalganlarga Qiyomat kuni musibatlari evaziga ko‘p ajr-savob berilganini ko‘rib o‘zlari ham dunyoda qaychilar bilan terilari qiyilishini va evaziga musibatdorlar qatorida bo‘lishni orzu qilinshadi”.
Tohirjon SOBIROV,
Hadis ilmi maktabi talabasi.
“Network News Pakistan”: 2025 yilda O‘zbekiston Markaziy Osiyo aholisi uchun eng ommabop sayohat yo‘nalishi bo‘ldi
Pokistonning “Network News Pakistan” elektron nashri “O‘zbekiston turizmi o‘sish bo‘yicha Markaziy Osiyoda birinchi o‘rinni egalladi” sarlavhali axborot maqolani e’lon qildi, deb xabar qilmoqda “Dunyo” AA.
Unda Butunjahon sayohat va turizm kengashining (World Travel & Tourism Council – WTTC) “Sayohat va turizmning 2026 yilga qadar iqtisodiy ta’sirini o‘rganish” hisobotiga ko‘ra, 2025 yilda Markaziy Osiyo dunyoning eng tez rivojlanayotgan sayyohlik mintaqasiga aylangani ta’kidlangan.
“WTTC o‘z tadqiqotlarini dunyoni 13 ta yirik mintaqaga bo‘lgan holda olib boradi. 2025 yil yakunlariga ko‘ra, Markaziy Osiyo turizm sohasini rivojlantirishning bir nechta asosiy ko‘rsatkichlari bo‘yicha dunyoda birinchi o‘rinni egalladi. Shu bilan birga, O‘zbekiston bu ko‘rsatkichlarning barchasi bo‘yicha Markaziy Osiyo mamlakatlari orasida yetakchiga aylandi”, – deyilgan manbada.
Nashrda qayd etilishicha, 2025 yilda turizmning Markaziy Osiyo yalpi ichki mahsulotiga qo‘shgan umumiy hissasi 17,7 foizga, sohaning bevosita hissasi esa 19,6 foizga oshgan. Mintaqada turistik xizmatlar eksporti (visitor exports) yil davomida 26,4 foizga o‘sib, 9,9 milliard AQSH dollarini tashkil etdi.
Mintaqadagi turistik xizmatlar eksporti umumiy hajmining deyarli yarmi O‘zbekiston hissasiga to‘g‘ri keladi. Jumladan, 2025 yilda O‘zbekistonga 4,8 milliard AQSH dollari miqdorida turistik xizmatlarni eksport qilgan. WTTC ma’lumotlariga ko‘ra, 2025 yilda O‘zbekiston Markaziy Osiyo aholisi uchun eng ommabop sayohat yo‘nalishi bo‘ldi.
“Umuman olganda, bu ko‘rsatkichlar turizmning mintaqaviy xarakterga ega ekanini anglatadi. Markaziy Osiyo aholisi ko‘pincha o‘z mintaqasi ichida sayohat qiladi”, – deyiladi maqolada.
“Network News Pakistan” WTTC prognoziga tayanib yozishicha, 2036 yilga borib turizm sohasining Markaziy Osiyo iqtisodiyotiga qo‘shadigan umumiy hissasi 29,7 milliard AQSH dollariga yetadi.
O‘zbekiston musulmonlari idorasi Matbuot xizmati
