Hadis ilmi maktabiga 150 ga yaqin kitob hadya qilindi
Hadis ilmi maktabining axborot-resurs markazi saxovatpesha homiylar tomonidan hadya qilingan kitoblar hisobidan boyib bormoqda.
Jumladan, yaqin kunlarda kutubxonaga 147 ta yangi kitob olib kelindi. Ular orasida "Fayzul-Furqon (Qur’oni karim ma’nolarining izohli tarjimasi)", "Qur’oni karim qissalari va komil inson tarbiyasi", "Sahihi Buxoriy sharhi 4-jild", "Ubaydulloh ibn Mas’ud sadrush shari’a va uning “Sharhul Viqoya” asari (tahorat kitobi)", "Birrul Validayn (ota-onaga yaxshilik qilish)", "Diniy soha xodimlarining kasb etikasi" kabi turli mavzularni qamragan kitoblar maktabga ehson qilindi.
Shuningdek, Hadis ilmi maktabi xodimi Fozil Tilovatovning muallifligida va tarjimasi bilan nashr qilingan "Horun Ar-Rashidning so‘ngi vasiyati", "Hello Amerika", "Salohiddin sahro burguti", "Onamning duosi", "Qorqizlarning qotilligi" kabi kitoblar ham shu xodim tomonidan maktabga hadya qilindi.
Shu munosabat bilan talabalar ishtirokida kutubxonada mazkur kitoblar ko‘rgazmasi o‘tkazildi.
Tadbirda har bir kitob haqida ma’lumotlar berildi va ularning mazmunan muhimligi xususida so‘z yuritildi.
Bu tadbir talabalarning ilmiy qiziqishini yanada kuchaytirishga va ularning ma’naviy taraqqiyotiga hissa qo‘shishga xizmat qildi.
Muhaddis.uz
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
