Namangan viloyatining Yangi Namangan tumanida joylashgan "Hidoya" o‘rta maxsus islom bilim yurti majlislar zalida Ramazon oyini ko‘tarinki ruhda o‘tkazish yuzasidan yig‘ilish bo‘lib o‘tdi. Viloyat hokimi o‘rinbosari Jamshid Xatamov va viloyat bosh imom-xatibi Musoxon Abbasiddinov raisligida o‘tkazilgan tadbirda shahar, tuman bosh imom-xatiblari, bosh mutavallilar hamda vakillik xodimlari ishtirok etdi. 

Yig‘ilishda ehtiyojmand oilalar, nogironlar, yolg‘iz keksalar, boquvchisini yo‘qotganlar hamda “Mehribonlik”, “Muruvvat” va “Saxovat” uylariga hadyalar ulashish, bemorlar holidan xabar olish kabi xayrli ishlar alohida qayd etildi.

Shuningdek, bosh-imomlarga xatmi Qur’onlarning tartibli o‘tishini ta’minlash, namozxonlarga munosib shart-sharoitlar hozirlashga ham e’tibor qilindi.

So‘zga chiqqanlar muborak oy munosabati bilan barcha masjidlarda hamda ularga tutash bo‘lgan ziyoratgoh, qadamjo va qabristonlarda muntazam ozodalik va obodonlashtirish ishlarini amalga oshirish, mo‘min-musulmonlar emin-erkin ibodat qilishi uchun masjidlarda xavfsizlik choralarini ko‘rish, jumladan, elektr, gaz, transport va yong‘in xavfsizligi hamda xonaqohlar muhofazasiga e’tibor qaratish muhimligi ta’kidlandi. 

O‘zbekiston musulmonlari idorasi
Matbuot xizmati