Savol: Janoza namozi o‘qib bo‘lingandan keyin tobut bilan birga qirq qadam yurish haqida hadis bormi?

Javob: Bismillahir Rohmanir Rohiym. Ha, bor, lekin u tobut bilan birga qirq qadam yurish haqida emas, balki tobutni ko‘tarib qirq qadam yurish haqida kelgan.

Fuqaholarimiz ta’kidlashlaricha, tobutni ko‘tarishda dastlab uning bosh tomonidagi tutqichini o‘ng yelkasiga oladi, so‘ngra oyoq tomonidagi o‘ng tutqichidan ko‘taradi. Keyin chap tomoniga o‘tib, avval bosh, so‘ngra oyoq tomonidan chap yelkada ko‘tariladi. Har tomondan o‘n qadamdan, jami qirq qadam ko‘tarib yurish mustahabdir. Chunki Payg‘ambarimiz sollallohu alayhi vasallam: "Kim tobutni qirq qadam ko‘tarsa, qirqta katta gunohlari o‘chiriladi”, deganlar.

Aytib o‘tilganidek, bu yo‘sinda ko‘tarish mustahab sanaladi. Qilsa, savob, qilmasa, gunoh bo‘lmaydi. Odatda janozada va tobut ko‘tarishda ko‘pincha, tiqilinch ro‘y beradi. Shu bois inson tobut ko‘tarishda o‘ziga qulay va boshqalarga ozor bermaydigan tarzda ko‘tarishi maqsadga muvofiq bo‘ladi. Vallohu a’lam.

O‘zbekiston musulmonlari idorasi
Fatvo markazi