Bugun, 19 fevral kuni Imom Buxoriy nomidagi Toshkent islom institutida modul ta’lim tizimi asosida ta’lim olayotgan bir guruh talabalar poytaxtimizdagi «Shayx Zayniddin» jome masjidiga tashrif buyurdi.
Toshkent shahar bosh imom-xatibi Abduqahhor domla Yunusov talabalar bilan uchrashib, ularga ilmning fazilatlari, bugungi imom qanday bo‘lishi kerak kabi mavzularda ma’ruza qildi.
Darhaqiqat, imomlik sharafli, ayni paytda mas’uliyatli burchdir. Zero, hadisi sharifda: «Imom zomin (zimmasiga oluvchi), muazzin omonatdordir. Allohim, imomlarni to‘g‘ri yo‘lga boshlagin va muazzinlarni mag‘firat qilgin», (Imom Abu Dovud rivoyati), deyilgan.
Ma’ruzani jon qulog‘i bilan tinglab, bunday uchrashuvlarni tashkil etgan institut ma’muriyatiga hamda Toshkent shahar bosh imom-xatibiga talabalar tashakkur bildirishdi.
Abduqahhor domla yoshlarning savollariga atroflicha javob qaytardilar.
Talabalarga "Mavlidi sharif" kitobi hadya etildi.
* * *
Tadbirdan so‘ng talabalar «Shayx Zayniddin» qabristoniga dafn etilgan marhum ustozlarning qabrlarini ziyorat qilib, Qur’oni karim oyatlaridan tilovat qildilar.
Xayrli duolar bilan tashrif nihoyasiga yetdi.
O‘zbekiston musulmonlari idorasi
Toshkent shahar vakilligi
Matbuot xizmati
Savol: Mo‘miyo halolmi? Uni iste’mol qilsa bo‘ladimi?
Javob: Bismillahir Rohmanir Rohiym. Ha, mo‘miyo halol va uni iste’mol qilish joiz. Mo‘miyo tog‘ jinsidan sizib chiqadigan quyuq modda bo‘lib, tabobatda qadimdan ishlatib kelingan. Shar’iy jihatdan esa, u tog‘ jinsidan sizib chiqadigan tabiiy modda va zararsiz ekanligi e’tiboridan iste’moli halol hisoblanadi. Zero, dinimizda: “Narsalar aslida muboh (halol)dir”, degan qoida bor.
Bundan ma’lum bo‘ladiki, barcha narsalar inson uchun yaratilgan bo‘lib, ulardan foydalanish halol. Qat’iy dalil sobit bo‘lmagunicha hech bir narsa harom bo‘lmaydi. Rasululloh sollallohu alayhi vasallam: “Alloh kitobida halol qilgan narsa halol, harom qilgan narsa harom, sukut qilgan narsa afv (etilgan)dir. Allohdan ofiyatni so‘ranglar, chunki Alloh esdan chiqarguvchi emas”, deganlar (Imom Abu Dovud rivoyati).
Ya’ni Alloh taolo ba’zi narsalar borasida halol yoki harom, degan hukmni bayon qilmagan. Shuning uchun ham ular mubohlik hukmida qolaveradi. Vallohu a’lam.
O‘zbekiston musulmonlari idorasi
Fatvo markazi.