Shu yil 25 fevral kuni Imom Buxoriy nomidagi Toshkent islom institutida oliy va o‘rta maxsus diniy ta’lim muassasalari rahbarlari seminari bo‘lib o‘tdi. Seminarni O‘zbekiston musulmonlari idorasi raisi o‘rinbosari Muhammadolim Muhammadsiddiqov ochib berdi. 
 

O‘zbekiston Respublikasi Din ishlari bo‘yicha qo‘mitasi raisining birinchi o‘rinbosari Davronbek Maxsudov so‘zga chiqib, diniy-ma’rifiy sohada kadrlar tayyorlash sifatini yangi bosqichga ko‘tarish, diniy ta’lim tizimidagi mavjud muammolar, ularning yechimlari va istiqboldagi rejalar haqida so‘z yuritib, quyidagilarni zikr qilib o‘tdi:

•  Jahondagi yetakchi islom ta’lim muassasalari, xususan, Azhar va shu kabi yetakchi ta’lim muassasalari tajribalarini o‘rgangan holda yurtimizdagi oliy va o‘rta maxsus diniy ta’lim muassasalaridagi ta’limning jozibadorligini oshirish lozimligi;

•  Chet el talabalarini ham yurtimizdagi diniy ta’lim muassasalariga o‘qishga jalb qilish maqsadida yangi adabiyotlar tayyorlash, o‘quv dasturi va rejalarini qayta shakllantirish, ijtimoiy va diniy fanlarni zamon talablari darajasida shakllantirish zarurligi;

•  Ta’lim jarayonlarini tashkil qilish, o‘quv dasturlarini qayta ishlab chiqish, xorijdan yetuk malakali mutaxassislarni jalb qilishda mavjud ta’lim mazmunini saqlab qolgan holda, boshqa yetakchi ta’lim muassasalarining ta’limga oid hujjatlaridan shablon sifatida foydalanish kerakligi;

•  Ta’lim sohasida amalga oshirilayotgan islohotlarning natijadorligini oshirish maqsadida diniy ta’lim muassasalarida ta’lim sifatini nazorat qilib borish mexanizmini joriy qilish muhimligi;

•  Talabalarda ta’lim bilan bir qatorda o‘z sohasi bo‘yicha tajribani ham shakllantirish maqsadida bitiruvchi kurs talabalarining amaliyotlarini Din ishlari bo‘yicha qo‘mita, O‘zbekiston musulmonlari idorasi, ilmiy tadqiqot markazlari va mahallalarda tashkil etilishi choralarini ko‘rish hamda Iqtidorli ustoz va talabalarni rag‘batlantirib borish mexanizmlarini joriy qilish lozimligi;

•  “Qur’on va tajvid” o‘quv kurslariga o‘xshash bir shaklda Aqidaviy bilimlarni ham xalqqa yetib borishiga xizmat qiladigan, xalqning turli yot g‘oyalarga ergashib ketish orqali jabr ko‘rishini oldini oladigan o‘quv kurslarini tashkil etish ham muhim hisoblanishi;

•  Din va davlat munosabatlarini tartibga solinishida Qur’on va sunnatda keltirilgan ko‘rsatmalarni o‘rganib kelajak avlodga o‘rgatish va bunda jahon tajribasidan keng foydalanish kerakligi ta’kidlandi.

Seminar davomida Muhammadolim domla Muhammadsiddiqov diniy ta’lim muassasalarida o‘tkazilgan attestatsiya natijalari, ijtimoiy-gumanitar fanlarning o‘qitilish ulushini oshirish, ta’lim sifatini yanada takomillashtirish hamda o‘quv reja va dasturlarini yangilash xususida so‘zlab, davlat tomonidan yaratib berilayotgan imkoniyatlardan foydalangan holda oliy va o‘rta maxsus diniy ta’lim muassasalarida diniy ta’limni yangi bosqichga olib chiqish bugungi kun talabi ekanini qayd etdi.

Shuningdek, diniy fanlarda klassik an’analarni saqlab qolgan holda, dunyodagi ilg‘or diniy ta’lim muassasalaridan namuna olgan holda zamonaviy diniy adabiyotlarni shakllantirish, zamonaviy diniy fan tarmoqlarini yaratish lozim ekani, mazkur fan tarmoqlari va adabiyotlarni shakllantirishda yurtimizdagi ilmiy tadqiqot markazlari bilan yaqindan amaliy hamkorlikni yo‘lga qo‘yish kerakligi ham alohida ta’kidlandi.

Shundan so‘ng diniy ta’lim muassasalarida 2025 o‘quv yili I-semestr yakunlari bo‘yicha talabalar o‘zlashtirishining dastlabki tahlillari bo‘yicha Hadis ilmi maktabi rektori B.Amanov, Imom Termiziy madrasasi direktori K.Islamov, Jo‘ybori Kalon madrasasi direktori O.Sharipova hamda Xoja Buxoriy madrasasi direktori O‘.G‘uzarovlar axborot berdi.

Seminar yakunida yig‘ilganlardan taklif va mulohazlar tinglandi. So‘ngra ishtirokchilar Toshkent islom institutidagi sharoitlar bilan tanishib, talabalar bilan uchrashishdi.

Toshkent islom instituti

 Matbuot xizmati