Muruvvatdan barcha mamnun!
Muhtaram Prezidentimizning «Ramazon – saxovat, birdamlik va bag‘rikenglik oyi» g‘oyasi asosida Toshkent shahrida ham saxovat tadbirlari yuqori saviyada o‘tkazilyapti.
Ramazonning to‘rtinchi kuni (4 mart) Toshkent shahar bosh imom-xatibi Abduqahhor domla Yunusov Bektemir tumaniga tashrif buyurdilar.
Tumandagi 5 ta nogironligi bor, kam ta’minlangan, boquvchisini yo‘qotgan oilalar holidan xabar olinib, ularga oziq-ovqat mahsulotlari tarqatildi.
Muruvvat ko‘rsatilgan oilalardan birida rus millatiga mansub yoshi ulug‘ onaxon yashaydi. Onaxon saxovatdan mamnun bo‘lib, bu xayrli ishlarning boshida turgan aziz insonlarni alqadi.
Islom bag‘rikeng, o‘zga millat va boshqa din vakillariga mehr-saxovat ko‘rsatadigan dindir.
Zotan, qaysi jamiyatda diniy bag‘rikenglik tamoyillariga rioya qilinsa, o‘sha jamiyatda o‘zaro hurmat va samimiyat qaror topib, barcha insonlar tinch va osoyishta hayot kechiradilar. Tinchliksiz taraqqiyot va farovonlik bo‘lmagani kabi diniy bag‘rikengliksiz tinchlik barqaror emas.
Alloh taolo ehsonlarni qabul aylasin!
Bu kabi xayr-saxovat tadbirlari shahrimizning boshqa tumanlarida ham davom etadi.
O‘zbekiston musulmonlari idorasi
Matbuot xizmati
Xo‘jaylida mehr-muruvvat tadbiri: 70 dan ortiq oilaga saxovat ulashildi
Muhtaram Prezidentimiz tashabbusi bilan yurtimiz bo‘ylab e’lon qilingan «Mahalla obodligi va mehr-oqibat oyligi» doirasida xayrli va savobli tadbirlar izchil davom etmoqda.
Ana shunday ezgu tashabbuslardan biri Din ishlari bo‘yicha qo‘mita, Qoraqalpog‘iston musulmonlari qoziyoti hamda Xo‘jayli tumanidagi «Pirim eshon» jome masjidi hamkorligida o‘tkazildi.
Tadbirda Qoraqalpog‘iston musulmonlari qozisi B.Razov, qozi o‘rinbosari A.Djolaushiyev, Xo‘jayli tumani bosh imom-xatibi I.Sherniyazov, shahar va tuman bosh imomlari hamda joriy yilda Haj ziyoratini ado etib qaytgan hoji otalar ishtirok etdilar.
Saxovatpesha homiylar ko‘magi bilan tashkil etilgan ushbu aksiya doirasida tumanning 14 ta mahallasida yashovchi 70 dan ortiq ijtimoiy himoyaga muhtoj oilalar holidan xabar olindi. Xonadonlarga tashrif buyurilib, farzandlar uchun maktab formalari hamda oziq-ovqat mahsulotlari topshirildi, diniy soha vakillari va hoji otalar fuqarolar bilan samimiy muloqotda bo‘lib, ularning fikr-mulohazalarini tingladilar.
Xalqimizga xos mehr-oqibat, bag‘rikenglik va hamjihatlik kabi yuksak qadriyatlarni mustahkamlashga xizmat qiladigan bu kabi xayriya tadbirlari respublikamiz bo‘ylab davom etmoqda.
O‘zbekiston musulmonlari idorasi
Matbuot xizmati
