Ramazon – saxovat, birdamlik va bag‘rikenglik oyi
Mamlakatimizda vijdon erkinligini ta’minlash, muqaddas Islom dinining insonparvarlik mohiyatini o‘zida mujassam etadigan qadriyat va an’analarni saqlash, millatlar va dinlararo totuvlik muhitini mustahkamlash, ehtiyojmand insonlarni har tomonlama qo‘llab-quvvatlash borasida ulkan ishlar olib borilmoqda.
Bu kabi ezgu ishlar muborak Ramazon oyida yanada ko‘proq amalga oshirilayotgani insonlar qalbida shukronalik tuyg‘ularini uyg‘otishi tabiiy.
Jumladan, Mudofaa vazirligi Markaziy harbiy klinik gospitali jamoasi ham saxovatli ishlarga baholi qudrat o‘z ulushlarini qo‘shib kelmoqda.
Aslida mamlakatimiz bo‘ylab bunday mehr-muruvvat va saxovat aksiyasi yil davomida amalga oshirilib kelinadi. Ayni kunlarda esa mazkur harakat marafon tarzida – keng miqyosda quloch yozgan. Turli darajadagi tibbiy ko‘makka muhtoj yuzlab hamyurtlarimizga shifo maskanida beg‘araz yordam ko‘rsatilyapti. Ular orasida oddiy fuqarodan tortib, Vatanimiz tinchligi yo‘lida qahramonlarcha halok bo‘lgan harbiy xizmatchilarning ota-onalari, oila a’zolari, Qurolli Kuchlar faxriylari bor.
Qo‘li yengil harbiy shifokorlar neyrojarrohlik, ko‘z jarrohligi, yurak-qon tomiri va urologik yo‘nalishdagi murakkab jarrohlik amaliyoti orqali ko‘plab insonlarning dardiga davo topmoqda.
Shuningdek, Markaziy harbiy klinik gospitalning yigirmaga yaqin davolash bo‘limlarida ham turli kasalliklardan aziyat chekayotgan hamyurtlarimizga tegishli muolajalar ko‘rsatilyapti.
Abdulla Barnoyev (Sariosiyo-Uzun voqealarida halok bo‘lgan Ulug‘bek Barnoyevning otasi), Husan Husanov, Bahrom Allayarov (Qurolli Kuchlar faxriylari), Sardor Toshpo‘latov (harbiy xizmatchi), Bahodir Isroilov, Shuhrat Xudoyorov kabi hamyutrlarimiz tajribali harbiy shifokorlarning xizmatlaridan mamnun. Ayniqsa, kasb taqozosi bilan xorijiy davlatlarda ko‘p bo‘lgan Bahodir Isroilov harbiy klinik gospitaldagi xizmat sifati va shart-sharoitlarni chet eldagidan zo‘rroq ekanligini e’tirof etdi.
Jarrohlik bo‘limlarida darddan forig‘ bo‘lgan bu insonlar Markaziy harbiy klinik gospitalida yaratilgan shart-sharoitlar uchun davlatimiz rahbariga, Mudofaa vazirligi rahbariyatiga, shuningdek tibbiy xizmat polkovnigi Tolib Siddiqov, tibbiy xizmat podpolkovniklari Farhod Umarov va Zuhriddin G‘aniyev, tibbiy xizmat mayori Ulug‘bek Yusupov kabi shifokorlarga cheksiz minnatdorliklarini izhor qilishdi.
Baxtsiz hodisa tufayli qattiq kuyish tashxisi bilan gospitalga olib kelingan buxorolik opa-singil Farangiz va Feruza Do‘stmurodovalarga ham klinika mutaxassislari tomonidan yordam ko‘rsatilyapti.
Asror RO‘ZIBOYEV,
“Vatanparvar” muxbiri.
O‘zA
Erhan Afyonju: O‘zbekiston – turkiy sivilizatsiyaning eng go‘zal shaharlari joylashgan zamin
Turkiyaning “CNN-Türk” telekanalida efirga uzatilgan “Tafakkur doirasi” dasturida so‘zga chiqqan taniqli olim, Milliy mudofaa universiteti rektori, professor Erhan Afyonju O‘zbekistonning boy tarixiy merosi va sayyohlik salohiyati haqida fikr yuritdi, deb xabar bermoqda “Dunyo” AA.
Ko‘rsatuvda qatnashgan turk tarixchisi Erhan Afyonju O‘zbekistonni turkiy sivilizatsiyaning eng go‘zal shaharlari joylashgan alohida geografik hudud sifatida ta’riflagan.
Olimning fikricha, juda ko‘pchilik sayyohlar O‘zbekistonni o‘z ko‘zi bilan ko‘rishni istaydi. Chunki dunyoga mashhur Samarqand, Buxoro, Xiva, Toshkent kabi shaharlar ana shu zaminda joylashgan.
Turk tarixchisi yoshlarga murojaat qilib, xorijga sayohat qilishni, avvalo, Turkiy dunyo mamlakatlarini kashf etish, ajdodlar yurti bilan yaqindan tanishishdan boshlash lozim ekanini ta’kidladi.
“Yoshlarga tavsiyam shuki, hozir xorijga sayohat qilmoqchi bo‘lsangiz, avvalo Turkiy zaminni aylaning. Masalan, O‘zbekistonga borib, tarixiy shaharlarni ko‘rib keling, ajdodlaringiz yurti bilan tanishing. So‘ng Saljuqiylar davlati barpo etilgan zaminlarni ko‘ring”, – dedi professor.
Erhan Afyonjuning ta’kidlashicha, bunday sayohatlar yoshlar uchun har tomonlama foydali va qiziqarli bo‘lib, ularning tarixiy xotirasi va dunyoqarashini boyitadi.
“Masalan, Samarqandning go‘zalligini dunyoning ko‘p joylarida topa olmaysiz. Ayniqsa, turk yoshlari o‘z ajdodlari yashagan zaminni borib ko‘rishlari lozim”, – dedi olim.
Professor O‘zbekistonni turkiy sivilizatsiyaning asosiy beshiklaridan biri, ilm-fan markazi sifatida ham alohida e’tirof etgan.
Shuningdek, turk tarixchisi O‘zbekistonning nafaqat tarixiy va madaniy, balki geografik jihatdan ham yashash uchun qulay hudud ekanini ta’kidlagan.
Dastur davomida professor bildirgan fikr-mulohazalar Turkiya jamoatchiligi orasida O‘zbekistonning tarixiy shaharlari, boy madaniy merosi va turizm salohiyatiga bo‘lgan qiziqishni yanada oshirishga xizmat qiladi.
O‘zbekiston musulmonlari idorasi Matbuot xizmati