Joriy yilning 12 mart kuni Qashqadaryo viloyati hokimligi, Din ishlari bo‘yicha qo‘mitaning Qashqadaryo viloyati hududiy boshqarmasi va O‘zbekiston musulmonlari idorasi Qashqadaryo viloyati vakilligi hamkorlikda viloyatda ijtimoiy-ma’naviy muhit barqarorligini ta’minlash, mahallada va boshqa ijtimoiy obyektlarda ortiqcha isrofgarchilikka yo‘l qo‘ymaslik, maktab o‘quvchilarini ilm-fan va kasb-hunarga qiziqtirish borasida amalga oshirilishi lozim bo‘lgan chora-tadbirlar rejasiga muvofiq tadbirlar o‘tkazildi.
Kunning birinchi yarimida Qarshi shahridagi “Asl” to‘yxonasida mahalla faollari, tadbirkorlar va aholi ishtirokida “Isrofgarchilik va dabdababozlik ijtimoiy illatlardir” mavzusida ma’naviy-ma’rifiy targ‘ibot tadbiri o‘tkazildi.
Mazkur tadbirda O‘zbekiston musulmonlari idorasining Qashqadaryo viloyatidagi vakili, viloyat bosh imom-xatibi Rahmatillo domla Usmonov tomonidan bugungi kunda to‘y, ma’raka va marosimlardagi haddan oshishlar, Dinimizda asli yo‘q bo‘lgan “uch”, “yetti”, “yigirma”, “qirq”, “yil” va hokazo marosimlar, Eng achinarlisi, ibodatlarda ham dabdababozlikka berilish, ibodatlarni ko‘z-ko‘z qilish kabi illatlar haqida Qur’oni karim oyatlari, hadislar va hayotiy voqealardan misollar keltirib ma’ruza qilindi.
Kunning ikkinchi yarmida Qarshi shahrida joylashgan 6-sonli maktab binosida ta’lim oluvchi o‘quvchilarning ota va onalari ishtirokida “Ilm va kasb hunar fazilati hamda ota-onalarning farzandlari oldidagi majburiyatlari” mavzusida suhbat o‘tkazildi.
O‘zbekiston musulmonlari idorasi
Qashqadaryo viloyati vakilligi
Matbuot xizmati
Davlatimiz Rahbarining «Ramazon – saxovat, birdamlik va bag‘rikenglik oyi» g‘oyasi asosida ayni kunlarda viloyatimizda saxovat tadbirlari izchil davom etyapti.
Bu jarayonda o‘zga millat, boshqa din vakillariga ham alohida e’tibor qaratilmoqda.
Shu yil 16 mart kuni Ramazonning 16-kuni (16 mart) Ohangaron tumani bosh imom-xatibi Husniddin domla Boyniyozov boshchiligida tumandagi imom-xatiblar ishtirokida kam ta’minlangan, boquvchisini yo‘qotgan, nogiron parvarishlanayotgan 36 ta oila holidan xabar olindi.
Homiylar ko‘magida ularning har biriga 300 ming so‘mlik, jami 11 million so‘mlik oziq-ovqat mahsulotlari yetkazib berildi.
Ular orasida rus, tatar, koreys millatiga mansub xonadon vakillari ham bor.
Alloh taolo marhamat qiladi: «Biror narsani (muhtojlarga xolis) ehson qilsangiz, bas, (Alloh) uning o‘rnini to‘ldirur. U rizqlantiruvchilarning yaxshisidir» (Saba’ surasi, 39 oyat).
Payg‘ambarimiz sollallohu alayhi vasallam esa: «Jonim izmida bo‘lgan Zotga qasam, sadaqa bilan mol kamaymaydi», deganlar (Imom Termiziy rivoyati).
Alloh taolo ehsonlarni qabul qilsin!
O‘zbekiston musulmonlari idorasi
Toshkent viloyati vakilligi
Matbuot xizmati