Gohida sehr va ko‘z tegishi orqali ham bandaga musibat yetadi. Shuning uchun musulmon odam mazkur ikki narsadan saqlanish yo‘llarini yaxshi bilib olishi kerak. Bulardan saqlanish muolaja qilishdan ko‘ra osonroqdir. Sehr va ko‘z tegishidan saqlanish bir necha uslublar bilan amalga oshadi:

1. Tavhid orqali ruhni tetiklashtirish.
2. Borlikdagi barcha narsaning tasarrufini faqat Alloh taoloning O‘zi qilishiga iymon keltirish.
3. Yaxshiliklarni ko‘p qilish.
4. Sehrgarligi va ko‘zi borligi bilan mashhur bo‘lgan odamlardan uzoqda bo‘lish.
5. Allohdan sehr va ko‘z tegishidan panoh so‘rab, kerakli duo va zikrlarni o‘qib yurish.
6. Mazkur duo va zikrlar haq ekani va ularning foydasi borligiga iymon keltirish. Mazkur iymon qancha kuchli bo‘lsa, ta’sir ham shunchalik kuchli bo‘ladi.
7. Mazkur duo va zikrlarni aytganda qalbning hozir bo‘lishi. Chunki g‘ofil qalb bilan qilingan duo qabul bo‘lmaydi.
8. Kunduzgi duo va zikrlar bomdod namozidan so‘ng, kechkilari asr namozidan keyin aytiladi.
9. Oyatul Kursiy, Baqara surasining oxirgi ikki oyati, Ixlos, Falaq va An-Nas suralarini sehr va ko‘z tegishidan saqlanish uchun o‘qiladi. Boshqa duolar va zikrlar ushbu kitobning tegishli joyida kelgan.

Shayx Muhammad Sodiq Muhammad Yusuf.