Namangan viloyati bosh imom xatibi Musoxon domla Abbasiddinov boshchiligida Namangan tumanining Shodlik tantanalar majmuasida hamda Yangi Namangan tumanining “Hazrati Bilol“ jome masjidida yig‘ilishlar o‘tkazildi.

Viloyat vakilligi xodimlari,  tumanlar bosh imom-xatiblari hamda  "Haj – 2024" ziyoratchilari, mahalla ahli ishtirok etgan ma’rifiy tadbirlarda dinimiz jamiyatda yashayotgan insonlarni o‘zaro tinch-totuv, hamjihatlikda yashashga buyurishi, ular o‘rtasida mehr-oqibat, o‘zaro hurmatga chorlashi hayotiy misollar asosida aytib o‘tildi.

Shuningdek, Qur’oni karim, hadisi shariflarda ilm va hunarga targ‘ib qiluvchi ko‘rsatmalarni misol sifatida keltirib, har bir ota-ona farzandiga el-yurt uchun kerakli bo‘ladigan hunar va foydali ilmlarni ham o‘rgatishi lozimligi ta’kidlandi.

Bundan tashqari, yosh avlod ongiga ona yurtga muhabbat, tinch-osoyishta hayotimizni qadriga yetish hamda shukronalik tuyg‘ularini singdirish masalalariga urg‘u berildi.

Tadbirlarning amaliy qismida mas’ullar Yangi Namangan tumani masjidlari hududidagi mahallalarning bir necha xonadonlariga kirib, aholi vakillaridan hol-ahvol so‘rashdi. Ularning muammolari o‘rganildi. Taklif va fikr-mulohazalari tinglandi. Lozim bo‘lgan oilalarga moddiy-ma’naviy ko‘maklar ko‘satildi.

O‘zbekiston musulmonlari idorasi

Matbuot xizmati