Talabalar bilan ijtimoiy muammo va milliy qadriyatlar bo‘yicha davra suhbati o‘tkazildi
Imom Buxoriy nomidagi Toshkent islom institutida juda muhim an’ana yo‘lga qo‘yilgan. Bu institut rahbariyatining talabalar bilan doimiy muloqotda bo‘lib turishini o‘z ichiga oladi. Kuni kecha mazkur an’ananing amaliy ko‘rinishi sifatida dolzarb mavzuda navbatdagi davra suhbati tashkil etildi.
Institut rektori Uyg‘un G‘afurov, Ilmiy ishlar va fan bo‘yicha prorektor Soatmurod Primov, “Qur’on ilmlari” kafedrasi mudiri Jahongir qori Ne’matov talaba-qizlar bilan bugungi kunning muhim masalalari, ijtimoiy-ma’naviy muhitni sog‘lomlashtirish, xotin-qizlar va yoshlar o‘rtasida turli salbiy holatlarning oldini olish borasidagi targ‘ibot ishlarida yangicha yondashuvlarni qo‘llash yuzasidan davra suhbati o‘tkazdi.
Uchrashuv ilmiy, ma’naviy-ma’rifiy, axloqiy va siyosiy sohalarni o‘z ichiga qamrab oldi. Talaba-qizlarning ish samaradorligi nafaqat institut yoki diniy soha doirasida, balki ularning jamiyat oldidagi fuqarolik pozitsiyasi, Yangi O‘zbekistonning ma’rifatli ayoli timsolini shakllantirish yuzasidan mas’uliyatlari haqida to‘xtalib o‘tildi.
Talabalarga mahalliy va xalqaro miqyosda amalga oshiralayotgan muhim siyosiy jarayonlar haqida ma’lumot berilib, O‘zbekiston Respublikasida fuqarolarning vijdon erkinligini ta’minlash va diniy sohadagi davlat siyosati konsepsiyasi, diniy-ma’rifiy sohadagi islohotlarning mazmun-mohiyati ochib berildi.
Davra suhbati qizg‘in va faol muloqot shaklida o‘tkazilib, ustozlar talabalarni ilmiy jihatdan shijoatlantirdi hamda yuqori muvaffaqiyatlarga erishish usullari va ularning tadrijiy bosqichlari borasida tavsiyalar berildi.
Shuningdek, uchrashuvda institut rektori U.G‘afurov talabalarning ilmiy izlanishlari muhimligini ta’kidlab, Davlat Rahbarining O‘zbekistonda islom sivilizatsiyasi markaziga qilingan tashrif doirasida diniy-ma’rifiy soha vakillari oldiga qo‘ygan muhim vazifalarini va hamda talabalarning bu vazifalarni bajarishga salohiyatli kadr bo‘lishlari muhimligini eslatib o‘tdi.
Suhbat xayrli duo bilan yakunlandi. Unda ustozlar Yaratgandan talabalarning ilmiy faoliyatlariga muvaffaqiyat va baraka so‘radi.
O‘zbekiston musulmonlari idorasi
Matbuot xizmati
Jannatning misoli
“Taqvodorlarga va’da qilingan jannatning misoli shuki, uning ostidan anhorlar oqadi, mevalari va soyalari doimiydir. Shu taqvo qilganlarning oqibatidir. Kofirlarning oqibati esa do‘zaxdir” (Ra’d surasi, 35-oyat).
Bu oyat taqvodorlarga va’da qilingan jannatni sifatlab berish ma’nosida bo‘lishi mumkin. Oyat “taqvodorlarga va’da qilingan jannat kofirlarga va’da qilingan do‘zaxga o‘xshash bo‘ladimi?” degan ma’noda bo‘lishi ham mumkin. Ya’ni jannat bilan do‘zax birbiriga o‘xshash emas.
Alloh taolo boshqa bir oyatda jannat haqida bunday marhamat qiladi: “Taqvodorlarga va’da qilingan jannatning misoli: ichida aynimagan suvli anhorlari, ta’mi o‘zgarmagan sutli anhorlari, ichuvchilar uchun lazzatbaxsh xamrli anhorlari, musaffo asalli anhorlari bor. Ular uchun unda barcha mevalar va Rabbilaridan mag‘firat bordir. Ular do‘zaxda mangu qoladigan, o‘ta qaynoq suv bilan sug‘orilib, ichaklari titilib ketadigan kimsa (kofirlar)ga o‘xsharmidi?” (Muhammad surasi, 15-oyat).
Alloh taolo bu oyatda bunday demoqda: “Sifati shunday doimiy ne’matlar ichra bo‘lgan kishilar mudom azoblanadigan, sifatlari ana unday bo‘lgan kimsalar kabi bo‘lurmi?” Ya’ni jannatiylar do‘zaxiylar kabi bo‘lmaydi. Shundan oldin kelgan oyat ham ushbu oyatga qiyos qilinadi.
“Uning ostidan anhorlar oqadi, mevalari doimiydir”. Ya’ni jannatning mevalari doimiy bo‘lib, aslo tugab qolmaydi. Ular dunyo mevalari va uning ne’matlariga o‘xshamaydi. Dunyo mevalarining har qanday turi vaqti bilan tugab qoladi. Shuning uchun ham Alloh taolo oxirat jannatining mevalari va undagi jamiki ne’matlar uzluksiz, doimiy ekanini hamda kofirlarga oxiratning azobi ham bardavom ekanini xabar qildi.
“Va soyalari…” Alloh taolo jannatning soyasi ham uzluksiz ekani, unda botishi bilan soyasi ham yo‘qoladigan quyosh bo‘lmasligini bayon etib, undagi barcha ne’matlarning davomiyligi va manfaatli bo‘lishini bildirdi. Soyada manfaat bor, lekin zarar yo‘q, quyoshda esa foyda bilan birga zarar ham bordir. Xuddi shunday, dunyo hayotida barcha narsalarda foydali taraflari bilan birga zararli jihatlar ham bo‘ladi. U ne’matlar kelishi vaqti bilan to‘xtab, zavol topadi. Alloh taolo oxiratdagi soya, jannatdagi barcha ne’matlar zararsiz, uzluksiz, boqiy bo‘lishini va ular dunyodagi soyaga va ne’matlarga o‘xshamasligini xabar qildi.
“Shu taqvo qilganlarning oqibatidir. Kofirlarning oqibati esa do‘zaxdir”. Ya’ni kofirlarning jazosi do‘zaxdir. Bu oyat ning zohirini e’tiborga oladigan bo‘lsak, go‘zal oqibat shirkdan saqlanganlarga bo‘lishi aytildi. Chunki Alloh taolo kofirlarning oqibati do‘zax ekanini zikr qildi. Ya’ni ular ning oqibati, jazosi do‘zaxdir. Jannat esa shirkdan saqlanganlarning mukofotidir.
“Kofirlarning oqibati esa do‘zaxdir”. Ya’ni kofirlarning jazosi do‘zaxdir. Yoki ushbu iboraning ma’nosi: “Taqvo qilganlar ning oqibati jannatdir, kofirlarning oqibati esa do‘zaxdir”.
Mufassirlardan ba’zilari Alloh taoloning “Bu taqvo qilganlarning oqibatidir” oyatining ma’nosini bunday bayon qiladi: “Ularning amallari, yaxshiliklarining oqibati jannatdir. Alloh taoloning yagonaligiga kufr keltirgan kimsalar amallarining oqibati esa do‘zaxdir”.
Imom Abu Mansur MOTURIDIYning “Ta’vilotul Qur’on” asaridan
Abdulatif ALLOQULOV tarjima qildi.
“Hidoyat” jurnalining 2025 yil 9-sonidan
http://hidoyatuz.taplink.ws