Hamdardlik bildiramiz
O‘zbekiston musulmonlari idorasi jamoasi Namangan viloyati bosh imom-xatibining birinchi o‘rinbosari Obidxon domla Ikramov volidai muhtaramalari vafoti munosabati bilan u kishining oila a’zolari va yaqinlariga chuqur ta’ziya izhor etadi.
Alloh taolo marhuma onaxonni O‘z mag‘firatiga olsin, iymonlari va solih amallarini o‘zlariga hamroh aylasin. Oxiratlarini obod etib, joylarini Firdavs jannatlaridan qilsin!
Oxirat safariga kuzatilgan onaxon el-yurt koriga yaraydigan, dinu diyonat yo‘lida xizmat qiladigan farzand va nevaralarni o‘stirdilar, chiroyli tarbiya qildilar.
Haq taolo marhuma onaxonning ahli oilasi, farzandu arjumandlari va yaqinlariga chiroyli sabr berib, bu musibatlarini yaxshiliklar ila to‘ldirsin.
O‘zbekiston musulmonlari idorasi jamoasi, ulamolari, imom-domlalari va o‘qituvchi-mudarrislari nomidan marhuma onaxonning yaqinlariga, xususan, Obidxon domlaga hamdardlik bildiramiz.
Janoza namozi bugun peshin namozidan so‘ng Namangan shahridagi "Shayx Eshon" jome masjidida o‘qiladi.
Innaa lillaahi va innaa ilayhi roji’uun.
«Musibat yetganda «Albatta, biz Allohnikimiz va albatta, biz Unga qaytuvchimiz», degan sabrlilarga xushxabar bering».
O‘zbekiston musulmonlari idorasi
Toshkentda O‘zbekiston va Qatar hamkorligidagi nufuzli ilmiy konferensiya bo‘lib o‘tmoqda
Toshkent davlat sharqshunoslik universitetida Qatar Sivilizatsiyalar alyansi qo‘mitasi hamda Qatar universiteti hamkorligida “O‘zbekistonda islom madaniy merosi va uning jahon ilm-fanida tutgan o‘rni” mavzusida nufuzli xalqaro ilmiy-amaliy konferensiya bo‘lib o‘tmoqda.
Forum O‘zbekiston va Qatar o‘rtasidagi ilmiy-ma’rifiy aloqalarni mustahkamlash, diyorimizdan yetishib chiqqan buyuk mutafakkirlarning bebaho merosini chuqur tadqiq etish hamda uni xalqaro miqyosda keng targ‘ib etish maqsadida tashkil etildi. Unda xorijlik taniqli olimlar, yurtimiz diniy soha vakillari, tadqiqotchilar hamda soha mutaxassislari ishtirok etmoqda.
Xalqaro tadbirda O‘zbekiston musulmonlari idorasi raisining birinchi o‘rinbosari Homidjon domla Ishmatbekov, Din ishlari bo‘yicha qo‘mitaning birinchi o‘rinbosari Davronbek Maxsudov, Imom Buxoriy nomidagi Toshkent islom instituti rektori Uyg‘un G‘afurov hamda Imom Buxoriy xalqaro ilmiy-tadqiqot markazi direktori Shovosil Ziyodov qatnashmoqda va o‘z ma’ruzalari bilan ishtirok etmoqda.
Konferensiyada yurtimiz zaminida shakllangan ilmiy maktablarning jahon tamadduni rivojiga qo‘shgan beqiyos hissasi alohida e’tirof etilmoqda. Imom Buxoriy, Imom Moturidiy, Abu Ali ibn Sino singari buyuk allomalarimiz ilmiy merosining bugungi kundagi ahamiyati muhokama qilinmoqda.
Shuningdek, so‘nggi yillarda yurtimizda ma’naviy-ma’rifiy merosni tiklash borasida amalga oshirilayotgan keng ko‘lamli ishlar, jumladan, O‘zbekistondagi Islom sivilizatsiyasi markazi va Imom Buxoriy majmuasida yaratilgan zamonaviy sharoitlar tanishtirilib, xorijlik mutaxassislar o‘zaro hamkorlikka da’vat etilmoqda.
Ma’lumot o‘rnida, mazkur nufuzli xalqaro anjuman ishi 8–9 sentyabr kunlari ham davom etadi.
O‘zbekiston musulmonlari idorasi
Matbuot xizmati
