Cavol: Ayrimlar biror ishni nohaqlik bilan bitirish uchun pora taklif yoki talab qiladilar? Bunga dinimizda qanday qaraladi?

Javob: Bismillahir Rohmanir Rohiym. Shariatimizda bunday ishlarga “rishva” – pora deyiladi va bu katta gunohlardan biridir.

Pora deb kishi haqli bo‘lmagan narsasiga erishish yoki zimmasiga lozim bo‘lgan narsadan qutulish uchun taqdim etgan mol yoki manfaatga aytiladi.

Odatda ko‘pchilik poraxo‘rlar porani hadya, sovg‘a sifatida qabul qiladilar. Beruvchilar ham “ko‘ngildan chiqdi”, “atadik” kabi chiroyli so‘zlar bilan qabih niyatlarini amalga oshirishga odatlanishgan.

Poraxo‘rlik dinimizda qattiq qoralangan va bu haqda hadisi sharifda shunday deyiladi:

Savbon roziyallohu anhu rivoyat qiladi: “Rasululloh sollallohu alayhi vasallam pora beruvchi, pora oluvchi va ularning o‘rtasidagi vositachini la’natladilar” (Imom Ahmad rivoyati).

Pora beruvchi jamiyatda belgilangan nizomni buzib, haqsizlik ila o‘z ishini bajarib ketgan hisoblanadi. Pora oluvchi vijdon amriga bo‘ysunmasdan, nohaqlikka, adolatsizlikka rozi bo‘lib, o‘z manfaatini o‘ylab, o‘zgalar haqiga xiyonat qilgan bo‘ladi.

Qolaversa, hadya deb bir narsani o‘zgaga xolis, evazsiz berishga aytiladi. Hadya beruvchi kishi hadyani oluvchi kishidan biror narsani nohaq undirish niyati bo‘lmaydi. Mana shu narsa hadyaning poradan asosiy farqini ko‘rsatadi. Vallohu a’lam.

O‘zbekiston musulmonlari idorasi
Fatvo markazi.