Janubiy Koreyadagi vatandoshlar Ramazon hayitini keng nishonladi
Kecha dunyoning turli mamlakatlarida bo‘lgani kabi, Koreya Respublikasida ham Ramazon hayiti keng nishonlandi, deb xabar qilmoqda "Dunyo" AA muxbiri.
Xususan, Janubiy Koreyada vaqtincha ishlayotgan va ta’lim olayotgan vatandoshlarimiz ham ushbu bayram ko‘tarinki ruhda kutib oldilar.
Bundan tashqari, muborak Ramazon oyi munosabati bilan Janubiy Koreyada bo‘lib turgan vatandoshlarimiz bilan diniy-ma’rifiy suhbatlar o‘tkazish maqsadida O‘zbekiston Musulmonlari idorasi rasmiy vakillari bir oy davomida ushbu mamlakatda bo‘ldi.
Mamlakatimiz elchixonasi tashabbusi bilan amalga oshirilgan ushbu tashrif doirasida imomlarimiz ishtirokida Janubiy Koreyadagi fuqarolarimiz zich yashaydigan shaharlarda "Ramazon-2025" ilmiy-ma’rifiy tadbirlari o‘tkazildi.
31 mart yurtdoshlarimiz eng ko‘p yashaydigan Mokpo, Tegu va Chondju kabi shaharlarda imomlarimiz bilan birgalikda Ramazon hayiti namozi o‘qildi.
Ma’ruzalar davomida O‘zbekiston Prezidentining xalqimizga Ramazon hayiti munosabati bilan yo‘llagan tabrigining mazmun-mohiyati va ahamiyati haqida so‘zlab berildi.
Ayniqsa, mamlakatimiz rahbari tabrigidagi "Mana shu shukuhli ayyomda chet ellarda ona yurtga sadoqat tuyg‘usi bilan yashayotgan vatandoshlarimizni ham Ramazon hayiti bilan chin dildan qutlab, ularga ezgu tilaklarimizni izhor etamiz", degan fikrlar alohida urg‘ulandi.
Vatandoshlar yurtimizda hukm surayotgan tinchlik va osoyishtalik, hukumatimiz tomonidan xorijda istiqomat qilayotgan fuqarolarga qaratilayotgan e’tibor va jonajon O‘zbekistonimiz tinchligi, xalqimiz farovonligini Yaratgandan so‘rab duo qildilar.
– Bu yil muborak Ramazon oyini Janubiy Koreyada vatandoshlar bilan birgalikda ko‘tarinki ruhda o‘tkazdik, – deydi Toshkent shahridagi "Yunus ota" masjidi imom xatibi Jamoliddin Qodirov. – Bir oy davomida Chondju shahrida istiqomat qilayotgan vatandoshlarga muqaddas Islom dinining asl mohiyati, Ramazon oyi fazilatlari, shukronalik hissi bilan yashash, berilgan ne’matlarning qadriga yetish, yurt ravnaqi, vatan taraqqiyoti, millatimiz hamjihatligi, xalq farovonligi yo‘lida astoydil xizmat qilish kabi mavzularda ma’ruzalar o‘qidik.
Agar bolam tuzalib ketsa...
Savol: Farzandim davolanish uchun xorijga ketgan edi. Men agar bolam tuzalib kelsa, tilla taqinchoqlarimni sadaqa qilaman, deb nazr qilgan edim. Alhamdulillah, tuzalib keldi. Sadaqa qilaman, deb tursam, qaynonam, taqinchoqlaringiz toza tilladan, uni menga soting va pulini sadaqa qilaverasiz, deb talab qilmoqda. Nima qilsam, to‘g‘ri ish qilgan bo‘laman?
Javob: Bismillahir Rohmanir Rohiym. Mazhabimizda zakot, fitr sadaqasi, ushr va nazr kabi vojib sadaqalarda, ularning qiymatini berish mumkin. Shu bois siz ham tillangizning o‘zini yoki sotib, pulini sadaqa qilsangiz ham bo‘ladi. Faqat sotishda, bozordagi narxi e’tiborga olinadi. Undan kam narxga sotish mumkin emas.
Kam narxga sotsangiz, tafovutini o‘zingizdan qo‘shib sadaqa qilishingiz lozim bo‘ladi. Masalan, tilla taqinchoqlaringiz narxi nazrni ado qilish kunlarida bozorda 10 million so‘m bo‘lsa, lekin tanishim yoki yaqin insonim deb, 8 millionga sotsangiz, yoniga 2 million qo‘shib, sadaqa qilasiz va shu bilan nazringizdan qutilasiz. Vallohu a’lam.
O‘zbekiston musulmonlari idorasi
Fatvo markazi