RAMAZONGA GO'ZAL TUHFA
Boshimizga oylar sultoni, ummat uchun ulkan imkoniyatlar oyi – Mohi Ramazon soya solib turibdi. Ayni kunlarda respublikamizning barcha hududlarida bo'lgani singari Toshkent viloyatida ham muborak oyga puxta tayyorgarlik ko'rilyapti. Rahmat oyi arafasida masjidlarning yangi binolari foydalanishga topshirilishi xayrli an'anaga aylanib qoldi.
Bugun – sayyidul ayyom juma kuni Zangiota tumanidagi "Umir" jome masjidining yangi binosi Ramazonga go'zal tuhfa sifatida mo'min-musulmonlar ixtiyoriga topshirildi.
Qur'oni karim tilovati bilan boshlangan ochilish marosimida Toshkent viloyati bosh imom-xatibi Jasurbek domla Raupov, tuman bosh imomi, nuroniy otaxonlar, mahalla faolari ishtirok etdi.
Masjidning eski binosi ta'mirtalab, namozxonlar uchun tor bo'lib qolgan edi. 2021 yilning 15 mart kuni jomening yangi binosiga ilk g'isht qo'yilgan edi. Oradan uch yil o'tib barcha shart-sharoitga ega zamonaviy baytulloh qad rostladi.
Yangi jome binosida, erto'la bilan qo'shib hisoblaganda, bir vaqtning o'zida uch ming kishi bemalol ibodatlarni ado etishi mumkin.
Go'zal imoratga monand tarzda zamonaviy tahoratxona ham bunyod etilgani mo'min-musulmonlarni behad quvontirdi. Masjidning shundoq yonginasida avtoturargoh ham barpo etilgani ayni muddao bo'ldi.
Endilikda namozxonlar yozning jaziramasida ham, qishning qahratonida ham bemalol jomega kelib, ulovlarni avtoturargohga qo'yib, emin-erkin ibodatlarni ado etishlari mumkin. Chunki masjidga konditsionerlar o'rnatilgan, iliq pol yotqizilgan.
Ochilish marosimi so'ngida Nabiy sollallohu alayhi va salamning «Kim Alloh taolo uchun bir masjid qursa, Alloh uning uchun jannatda bir uy quradi» (Imom Muslim rivoyati), degan muborak hadislari Allohning baytini obod qilishga hissa qo'shgan barcha aziz insonlarga mujda tarzida aytilib, ularning haqlariga xayrli duolar qilindi.
Eslatib o'tamiz, Ramazon oyi boshlangunga qadar Toshkent viloyatida yana 2–3 ta masjidning yangi binolarini foydalanishga topshirali, inshoalloh.
Toshkent viloyati vakilligi
Matbuot xizmati
Misr OAV: O‘zbekiston muftiysining Rabiul avval oyiga bag‘ishlangan maqolalari ma’naviy yangilanish va Nabaviy sunnatga ergashishga chorlamoqda
Misrning nufuzli ommaviy axborot vositalarida O‘zbekiston muftiysi, shayx Nuriddin Xoliqnazarning Muhammad alayhissalom tavallud topgan muqaddas Rabiul avval oyiga bag‘ishlangan turkum maqolalari chop etildi, deb xabar bermoqda “Dunyo” AA muxbiri.
Xususan, Misrning “Al Gomhuria” nashri sahifalarida Rabiul avval oyi musulmonlar qalbida alohida o‘rin tutishi va Ummaning Payg‘ambarimizga bo‘lgan cheksiz muhabbati tufayli bu oy an’anaviy ravishda “Mavlid oyi” deb atalishi haqidagi fikrlar keng yoritilgan. Materialda Muftiyning ushbu davrni yangi ma’naviy ko‘tarinkilik bilan kutib olish, uni “Nabaviy siyrat oyi” va “Ibratli ummat oyi”ga aylantirish, ibodat, axloq va madaniyat masalalarida Payg‘ambarimiz o‘gitlarini amaliy o‘zlashtirishga qaratilgan da’vati alohida ta’kidlangan.
“Ya7dosal2an” nashri ham Islom e’tiqodining ajralmas qismi va chin imonning asosiy sharti bo‘lgan Payg‘ambarimizga bo‘lgan muhabbat sabablari haqidagi metodologik masalani qayd etgan. Maqolada sahobalarning sadoqatiga oid tarixiy misollar va guvohliklar keltirilgan.
“Aldawlanews” resursida Islomni amaliy tushunishning oliy manbai sifatida Nabaviy siyratni o‘rganishning ahamiyati ko‘rib chiqilgan bo‘lib, unda shunchaki sanalarni yodlash o‘rniga har bir tarixiy voqeadan sabr, adolat va rahmat kabi hayotiy saboqlarni chiqarish zarurligi urg‘ulangan.
“Al Diplomacy” nashri esa Payg‘ambarimizga bo‘lgan chin muhabbatning uch asosiy belgisiga — siyrat haqida tafakkur qilish, sunnatga so‘zsiz ergashish va ruhlar shifosi hamda jamiyatda axloqni mustahkamlashning ma’naviy asosi bo‘lgan ko‘p salavot aytishga e’tibor qaratdi.
“Sada El Balad” rasmiy resursi O‘zbekiston muftiysining Rabiul avval oyini oilalar va ta’lim muassasalari uchun keng qamrovli tarbiyaviy loyihaga aylantirish tashabbusini yoritib, musulmonlarni ushbu oyni yuksak axloq va jipslikning oliy namunasiga ergashish yo‘lidagi yangi debochaga aylantirishga chaqirdi.
“Eldameer” axborot portali ham O‘zbekiston muftiysining asarlarini atroflicha taqdim etib, Rabiul avval oyining chuqur mazmuni va sunnatga ergashish orqali ma’naviy poklanishning muhimligiga e’tibor qaratdi.
O‘zbekiston musulmonlari idorasi Matbuot xizmati
