Shu yil 19 may kuni mamlakatimizga kelgan Qatar vaqf va islom ishlari vaziri o‘rinbosari Muhammad al-Kavvariy boshchiligidagi delegatsiyani Diniy idora raisining birinchi o‘rinbosari Homidjon domla Ishmatbekov va Din ishlari bo‘yicha qo‘mita raisining birinchi o‘rinbosari Davronbek Maxsudov qabul qildi.
Muloqotda O‘zbekiston va Qatar aloqalari rivojlanayotganiga to‘xtalish barobarida yurtimizdagi diniy-ma’rifiy sohadagi so‘nggi islohotlar, ilmiy-tadqiqot markazlari, masjid-madrasalar, Fatvo markazi, Qur’oni karim va tajvid o‘quv kurslari, nashriyot-matbaa ishlariga oid ma’lumotlarga delegatsiya vakillari qiziqish bildirdi.
Muhammad al-Kavvariy bu zamin dunyo tamadduni markazlaridan biri ekani, ulug‘ mutafakkirlarimiz bashariyat taraqqiyotiga katta hissa qo‘shgani, Imom Buxoriy, Imom Moturidiy, Imom Termiziy kabi allomalar dinimiz rivojiga katta hissa qo‘shish barobarida butun olamga mashhurligini e’tirof etdi.
Uchrashuv davomida ikki davlat mutaxassislari ishtirokida qo‘lyozmalarni o‘rganish, tadqiq etish va ularni chop etish, diniy ta’lim, ziyorat turizmi yo‘nalishida hamkorlik qilish va boshqa masalalar muhokama etildi.
Yuqorida bildirilgan taklif va fikr-mulohazalar asosida amaliy chora-tadbirlarni amalga oshirish yuzasidan o‘zaro kelishib olindi.
Mehmonlar Diniy idora Kutubxona fondidagi noyob va nodir asarlar bilan tanishish asnosida Mo‘yi muborak madrasasida joylashgan hazrati Usmon Mus'hafini ham ziyorat qilishdi.
Ma’lumot o‘rnida bundan bir oy muqaddam mamlakatimizga amaliy tashrif bilan kelgan Qatar vaqf va islom ishlari vaziri G‘anim bin Shahin al-G‘anim bilan yurtimizning diniy soha rahbarlari uchrashuv o‘tkazgan edi. https://t.me/muslimuzportal/41058
O‘zbekiston musulmonlari idorasi
Matbuot xizmati
Akademiyada yangi o‘quv yili boshlandi
Talabalik inson hayotining oltin davri hisoblanadi. Talabalik va yoshlik cheksiz imkoniyatlar, ulkan maqsadlar sari olib boruvchi, zavq-shavqqa to‘lgan eng go‘zal pallasidir. Har bir fasl singari, har bir davrning ham o‘z fazilati va xislati bor.
Ayni paytda yurtimiz ta’lim muassasalarida yangi o‘quv yili boshlandi. Shu munosabat bilan O‘zbekiston xalqaro islomshunoslik akademiyasida ham “Yagona Vatan, yagona xalq bo‘lib, yangi hayot va kelajak yaratamiz!” shiori ostida ma’naviy-ma’rifiy bayram tadbiri bo‘lib o‘tdi.
Unda Din ishlari bo‘yicha qo‘mita raisining birinchi o‘rinbosari Davronbek Maxsudov, O‘zbekiston yozuvchilar uyushmasi a’zosi, Akademiya Jamoatchilik kengashi raisi Iqboljon Mirzaaliyev, Toshkent shahar bosh imom-xatibi Abduqahhor domla Yunusov, Akademiya professor-o‘qituvchilari, talabalar, ota-onalar, Akademik litseyning o‘qituvchi va o‘quvchilari ishtirok etdi.
O‘zbekiston xalqaro islomshunoslik akademiyasi Matbuot xizmati xabariga ko‘ra, marosim O‘zbekiston Respublikasining Davlat madhiyasi bilan boshlandi. Madhiya sadolaridan so‘ng Akademiya birinchi prorektori Habibullo Sadibaqosev so‘zga chiqib, yig‘ilganlarga rektor Muzaffar Komilovning bayram tabrigini o‘qib eshittirdi.
Akademiya prorektori so‘nggi yillarda mamlakatimiz ta’lim sohasini tubdan isloh qilish bo‘yicha keng ko‘lamli islohotlar amalga oshirilayotganini e’tirof etdi. Yoshlarni oliy ta’limga qamrovini oshirib borish, zamonaviy va raqobatbardosh kadrlar tayyorlash borasida izchil siyosat olib borilayotgani, bu borada O‘zbekiston xalqaro islomshunoslik akademiyasi nafaqat yurtimiz, balki mintaqamizdagi eng nufuzli va sharafli o‘quv muassasasi hisoblanishini qayd etdi.
Darhaqiqat, davlatimiz rahbari tashabbuslari bilan tashkil etilgan O‘zbekiston xalqaro islomshunoslik akademiyasida jamiyat rivojiga hissasini qo‘shadigan, o‘z sohasining malakali mutaxassislarini kamolga yetkazish ustuvor vazifa sanaladi.
Bugungi kunda Akademiyada Islom iqtisodiyoti va xalqaro munosabatlar, Mumtoz sharq filologiyasi hamda Islomshunoslik fakultetlari, “Islomshunoslik va islom sivilizatsiyasini o‘rganish ICESCO”, “Islom tarixi va manbashunosligi IRCICA”, “Ijtimoiy fanlar va huquq”, “Dinshunoslik va jahon dinlarini qiyosiy o‘rganish UNESCO”, “Zamonaviy axborot-kommunikatsiya texnologiyalari”, “Din psixologiyasi va pedagogika” kafedrasi kabi 10 ta kafedra faoliyat olib bormoqda.
Tadbir davomida Din ishlari bo‘yicha qo‘mita raisining birinchi o‘rinbosari Davronbek Maxsudov, O‘zbekiston yozuvchilar uyushmasi a’zosi, Akademiya Jamoatchilik kengashi raisi Iqboljon Mirzaaliyev, O‘zbekiston xalqaro islomshunoslik akademiyasi professori, “Imom Buxoriy” ordeni sohibi Zohidjon Islomov so‘zga chiqib, yig‘ilganlarni bayram bilan muborakbod etishdi.
Shuningdek, marosimda talabalarning ota-onalari so‘z oldi. Talabalar tomonidan Akademiya madhiyasi ijro etildi. Tadbir yakunida Toshkent shahar bosh imom-xatibi Abduqahhor domla Yunusov so‘z olib, barchaga yangi o‘quv yili xayrli kelishini so‘rab, duo qildi.
Tantanali marosim auditoriyalardagi “Mustaqillik darslari” bilan davom etdi.
O‘zbekiston musulmonlari idorasi Matbuot xizmati