Vladivostokda ma’rifiy suhbatlar
Rossiya Federatsiyasi hududida vaqtincha bo‘lib turgan fuqarolarimiz bilan doimiy muloqotni qo‘llab-quvvatlab turish, ularning haq-huquqlarini himoya qilish, ma’rifiy suhbatlar o‘tkazish maqsadida joriy yilning 29 iyun – 2 iyul kunlari O‘zbekiston Respublikasi delegatsiyasi Vladivostok shahrida xizmat safarida bo‘lishdi. Delegatsiya tarkibida O‘zbekiston Respublikasi Tashqi ishlar vaziri o‘rinbosari O.Abdullayev, O‘zbekiston Respublikasining Rossiya Federatsiyasidagi favqulodda va muxtor elchisi B.Asadov, O‘zbekiston Respublikasining Rossiya Federatsiyasidagi Bosh konsuli M.Xayriddinov kabi nufuzli vakillar qatorida O‘zbekiston musulmonlari idorasi vakili Ibrohimjon domla Inomov ham ishtirok etdi.
Safar davomida Rossiya Federatsiyasi Ichki ishlar vazirligining Vladivostok shahridagi pasport-viza xizmatida, Vladivostok, Xabarovsk shaharlaridagi o‘zbek diasporasi rahbarlari va Primorsk o‘lkasidagi o‘zbek diasporasi vakillari, o‘zbekistonlik talabalar, turli xizmatlarda faoliyat ko‘rsatayotgan migrantlar bilan, Vladivostokdagi “Vladtorg” savdo kompaniyasida, Vladivostokda OOO “Viktoriya” qurilish firmasida, Primorsk o‘lkasidagi “Dobroflot” baliqovlash kompaniyasi zavodlarida xizmat qilayotgan vatandoshlarimiz bilan samimiy suhbatlar o‘tkazildi.
“Milliy va diniy qadriyatlarimiz”, “Aqidada adashmaylik!”, “Ijtimoiy tarmoqlardan foydalanish odobi”, “Islomda bag‘rikenglik”, “Islomda vatanparvarlik tushunchasi” kabi mavzularda o‘tgan suhbatlardan yurtdoshlarimiz kerakli tushunchalar hosil qilib, mamnun bo‘lishdi.
O‘zbekiston musulmonlari idorasi
Matbuot xizmati
Xushxabar: Xoja Buxoriy ta’lim muassasasi mudiri ilmiy darajaga ega bo‘ldi
Xoja Buxoriy o‘rta maxsus islom ta’lim muassasasi mudiri O‘tkir domla G‘uzarov pedagogika fanlari bo‘yicha falsafa doktori (PhD) ilmiy darajasiga ega bo‘ldi.
Tadqiqotchi O‘tkir Umbarovich G‘uzarov Qarshi davlat universiteti huzuridagi Ilmiy kengashda 13.00.01 – "Pedagogika nazariyasi. Pedagogik ta’limotlar tarixi" ixtisosligi bo‘yicha "Pedagogik jarayonda Burhoniddin an-Nasafiyning didaktik g‘oyalarini tizimlashtirish mexanizmlari" ("Go‘zal xulqlar" asari misolida) mavzusidagi dissertatsiya ishini muvaffaqiyatli himoya qildi.
Ushbu ilmiy natija ta’lim muassasasi jamoasi uchun katta quvonch bo‘lib, diniy ta’lim tizimida ilmiy-tadqiqot ishlarini chuqurlashtirish va ajdodlarimiz boy ma’naviy merosini zamonaviy pedagogikaga tatbiq etish yo‘lidagi muhim qadamlardan biridir.
O‘zbekiston musulmonlari idorasi jamoasi O‘tkir domla G‘uzarovni qo‘lga kiritilgan ilmiy daraja bilan samimiy qutlab, ilm yo‘lidagi sa’y-harakatlariga baraka, kelgusi ilmiy-pedagogik faoliyatiga ulkan zafarlar tilaydi.
O‘zbekiston musulmonlari idorasi
Matbuot xizmati
