Ko'z tegmasligi uchun nima qilsam bo'ladi?
Cavol: Meni yosh farzandim bor. Bir qo'shni ayol uni ko'rib qolsa, “Bu bunchalar chiroyli ekan”, “Shirinligini qarang buni” deb ko'p gapiradi. Shunda ko'z tegmasligi uchun nima qilsam bo'ladi?
Javob: Bismillahir rohmanir rohiym.
Ko'z tegishi voqe'likda bor narsa ekani ko'plab hadisi shariflarda aytib o'tilgan. Oisha raziyallohu anhodan rivoyat qilingan hadisi sharifda Payg'ambarimiz sollallohu alayhi vasallam: “Ko'z tegishidan Alloh panoh berishini so'ranglar, chunki ko'z tegishi – haqdir”, deganlar (Imom Ibn Moja rivoyati).
Ko'z tegishiga qarshi Rasululloh sollallohu alayhi vasallam quyidagi duoni o'qib dam solardilar.
Ibn Abbos roziyallohu anhumodan rivoyat qilinadi. Nabiy sollallohu alayhi vasallam Hasan va Husaynga panoh tilab: “U'iyzukumaa bikalimaatillahit-taammati min kulli shaytonin va haammatin. Va min kulli aynin laammatin”
Ma'nosi: “Ikkingizga Allohning tugal kalimalari ila har bir shaytondan va zararkunandadan hamda gunohkor ko'zdan panoh tilayman” deb aytardilar va so'ngra: “Bobongiz (Ibrohim alayhissalom) bular ila Ismoil va Ishoq alayhimussalomga panoh tilar edi”, derdilar” (Abu Dovud va Termiziy sahih sanad ila rivoyat qilganlar).
Yana shuni ta'kidlash lozimki, kishi biror ne'matni ko'rganida unga ko'zi tegib, zarar etib qolmasligi uchun ko'rgan ne'mat haqqiga duo qilib qo'yishi kerak. Shunda o'ziga tegishli bo'lgan yoki biror birodariga tegishli bo'lgan narsaga ziyoni tegib qolmaydi. Bu haqda Nabiy alayhissalom shunday deganlar: “Sizlardan biringiz o'zida, molida yoki birodarida ko'zni quvontiradigan narsani ko'rsa, unga baraka so'rab duo qilsin. Chunki ko'z tegishi – haqdir”(Imom Hokim rivoyati) Vallohu a'lam!
O'zbekiston musulmonlari idorasi Fatvo markazi.
Buxoroda Qur’on musobaqasi o‘tkazildi
O‘zbekiston Respublikasi Davlat mustaqilligining 35 yilligi munosabati bilan Buxoro viloyatida faoliyat olib borayotgan imom-xatib va imom-noiblar o‘rtasida “Qur’on tinchlikka buyuradi” shiori ostida Qur’on musobaqasi o‘tkazildi.
Ochilish marosimida Buxoro viloyati bosh imom-xatibi Jobir domla Elov so‘zga chiqib, mazkur ma’rifiy tadbirning ahamiyati haqida so‘zlab, ishtirokchilarga muvaffaqiyat tiladi.
Musobaqani o‘tkazishdan ko‘zlangan maqsad diniy soha xodimlarining Qur’oni karim bo‘yicha bilim va mahoratini yanada oshirish, ular o‘rtasida o‘zaro hamjihatlik muhitini shakllantirishdir.
Bellashuvda viloyatning tuman va shaharlarida faoliyat yuritayotgan 10 nafar imom-xatib va imom-noib ishtirok etib, Qur’oni karimni o‘qish va yoddan bilish borasidagi bilim va mahoratini namoyish etishdi.
Birinchi o‘ringa Peshku tumani “Chiqirchi” jome masjidi imom-noibi Afzal Shavkatov sazovor bo‘ldi. Ikkinchi o‘rin Buxoro shahridagi “Volidi Abdulazizxon” jome masjidi imom-noibi Abduvohid Akramovga, uchinchi o‘rin Jondor tumani “Raboto‘g‘lon” jome masjidi imom-xatibi Shuhrat Sherovga nasib etdi.
G‘oliblarga diplom va qimmatbaho sovg‘alar topshirildi.
O‘zbekiston musulmonlari idorasi
Matbuot xizmati
