O‘zbekiston delegatsiyasining Rossiyadagi uchrashuvlari samarali o‘tdi
Avval xabar berganimizdek, shu yil 20–24 avgust kunlari Rossiya Federatsiyasining Stavropol va Rostov hududlariga O‘zbekiston delegatsiyasining xizmat safari tashkil etildi. Safardan ko‘zlangan asosiy maqsad — vaqtincha Rossiyada yashab turgan fuqarolarimiz bilan doimiy muloqot o‘rnatish, ularning huquqiy xabardorligini oshirish va ma’naviy-ma’rifiy qo‘llab-quvvatlashdan iboratdir.
Delegatsiya tarkibida bir qator vazirlik va idoralar vakillari, shu jumladan, O‘zbekiston musulmonlari idorasi raisi o‘rinbosari Zayniddin Eshonqulov uchrashuvlar chog‘ida yurtdoshlarimizni Mustaqillik bayrami bilan tabriklab, ularga vatan sog‘inchi, adolat va ma’rifat ruhida suhbatlar o‘tkazdi.
Muloqotlarda diniy bag‘rikenglik, halol mehnat, ijtimoiy tarmoqlardan mas’uliyatli foydalanish, yoshlar o‘rtasidagi diniy savodxonlik va turli g‘arazli oqimlardan ehtiyot bo‘lish zarurligi kabi mavzularga alohida e’tibor qaratildi. Shuningdek, ishtirokchilarga tegishli mavzulardagi ma’lumotnomalar va bukletlar tarqatildi.
Safar doirasida Stavropol musulmonlari qozisi Muhammad hazrat bilan uchrashuv bo‘lib o‘tdi. Shunga qo‘shimcha, Xalqaro Kavkaz universitetida tahsil olayotgan 285 nafar o‘zbekistonlik talabalar bilan alohida uchrashuv o‘tkazildi. Universitet ma’muriyati o‘zbekistonlik yoshlarning bilimga chanqoqligi va odob-axloqini alohida e’tirof etdi.
Shuningdek, "Ovakon" MCHJ qurilish tashkilotining 500 nafar, "Yugstroy invest" qurilish tashkilotining 200 nafar ishchilari bilan ham ana shunday ma’rifiy suhbatlar o‘tkazildi.
Uchrashuvlarda O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining duo va salomlari yetkazildi. Shu bilan birga, yurtimizda amalga oshirilayotgan islohotlar, tinchlik va barqarorlikni mustahkamlash, diniy-ma’naviy soha taraqqiyoti haqida ham ma’lumotlar berildi.
O‘zbekiston musulmonlari idorasi
Matbuot xizmati
“Azzaman” gazetasi: Yangi O‘zbekistonda keng qamrovli islohotlar amalga oshirilmoqda
Iroqning “Azzaman” gazetasida “O‘zbekiston mustaqilligining o‘ttiz besh yilligi: Davlat barpo etishdan Uchinchi Renessans sari” nomli maqola e’lon qilindi, deb xabar bermoqda “Dunyo” AA.
Maqolada ta’kidlanishicha, O‘zbekistonning mustaqillik yillarida bosib o‘tgan taraqqiyot yo‘li, amalga oshirilgan keng ko‘lamli islohotlar hamda mamlakatning xalqaro maydondagi nufuzi tobora yuksalib bormoqda.
1991 yilda qo‘lga kiritilgan mustaqillik O‘zbekiston xalqi hayotida tarixiy burilish yasab, milliy davlatchilik asoslarini shakllantirish, iqtisodiy taraqqiyot poydevorini yaratish va ijtimoiy barqarorlikni ta’minlash jarayonini boshlab berdi.
2016 yildan boshlab Prezident Shavkat Mirziyoyev rahbarligida mamlakatda “Yangi O‘zbekiston” tamoyili asosida keng qamrovli islohotlar amalga oshirilmoqda. Ushbu jarayonda O‘zbekiston Markaziy Osiyoda izchil va muvozanatli rivojlanish yo‘lidan borayotgan davlat sifatida e’tirof etilmoqda.
Muallif O‘zbekistonda so‘nggi yillarda iqtisodiyotni liberallashtirish, investitsiyalarni jalb etish, savdo-iqtisodiy aloqalarni kengaytirish, infratuzilmani modernizatsiya qilish, raqamlashtirish va tadbirkorlik muhitini yaxshilash borasida amalga oshirilgan chora-tadbirlarga e’tibor qaratgan.
Maqolada aholini ijtimoiy himoya qilish tizimini takomillashtirish, ta’lim va sog‘liqni saqlash xizmatlari sifatini oshirish, yoshlar hamda xotin-qizlarning jamiyatdagi faolligini kuchaytirishga qaratilgan islohotlar haqida ham alohida fikr yuritilgan.
Nashrda Prezident Shavkat Mirziyoyev tomonidan ilgari surilgan “Uchinchi Renessans” g‘oyasi O‘zbekiston taraqqiyotining muhim strategik yo‘nalishlaridan biri sifatida baholangan. Unda Xorazmiy, Beruniy, Ibn Sino, Imom Buxoriy va Imom Termiziy kabi buyuk allomalar yetishib chiqqan yurt bugungi kunda ilm-fan, innovatsiya, texnologiya va inson kapitalini rivojlantirish orqali yangi uyg‘onish davrini yaratishga intilayotgani qayd etilgan.
Iroq matbuoti O‘zbekistonning islom sivilizatsiyasi tarixidagi o‘rniga ham to‘xtalib, mamlakatda boy ilmiy-ma’rifiy merosni o‘rganish va targ‘ib qilishga qaratilgan loyihalar amalga oshirilayotganini ta’kidlagan. Jumladan, Toshkent shahrida bunyod etilgan Islom sivilizatsiyasi markazi Movarounnahr allomalarining jahon tamadduniga qo‘shgan ulkan hissasini namoyish etuvchi muhim ilmiy-madaniy maskan sifatida qayd etilgan.
O‘zbekiston musulmonlari idorasi Matbuot xizmati