Qamashida “Yangi O‘zbekiston” massivi qurilishiga start berildi
Qamashi tumanida “Yangi O‘zbekiston” massivi qurilishiga rasman start berildi (https://t.me/qashmatbuot/9149?single). Mazkur loyiha tumanning Oqguzar mahallasi hududida joylashgan 66 gektar maydonda amalga oshirilayotgan bo‘lib, u kelajakda aholi uchun barcha shart-sharoitlarga ega zamonaviy turarjoy va ijtimoiy infratuzilmani o‘z ichiga olgan yangi shaharchani tashkil etadi.
Davlatimiz rahbarining Qashqadaryo viloyatiga tashrifi davomida Qamashi tumanida aholi turmush darajasini yanada oshirish bo‘yicha aniq vazifa va ustuvor yo‘nalishlar belgilab berilgan edi. Mazkur massiv qurilishi aynan shu vazifalar ijrosi doirasida amalga oshirilayotgan keng ko‘lamli ishlarning amaliy ifodasidir.
Qurilishning birinchi bosqichida 7 qavatli 32 ta ko‘p qavatli uy barpo etilishi rejalashtirilgan bo‘lib, jami 952 xonadon foydalanishga topshiriladi. Ushbu uylar barcha zarur kommunikatsiyalar — tabiiy gaz, elektr energiyasi, ichimlik suvi va markazlashgan kanalizatsiya tizimi bilan ta’minlanadi. Shuningdek, zamonaviy infratuzilma doirasida har bir xonadonga optik internet va videokuzatuv tizimlari ulanishi ko‘zda tutilgan.
Turarjoylar bilan bir qatorda massiv hududida maktab, bolalar bog‘chasi, klinika, madaniyat markazi, sport majmuasi, istirohat bog‘i, avtoshohbekat, yashil hududlar hamda tikuvchilik fabrikasi qurilishi belgilangan. Bu esa fuqarolar uchun nafaqat qulay yashash sharoiti, balki ish o‘rinlari, ta’lim, tibbiy xizmat va dam olish imkoniyatlarini ham yaratadi.
Loyiha ochilishi munosabati bilan o‘tkazilgan tadbirda Qashqadaryo viloyati hokimi Murotjon Azimov, (https://t.me/kamashi24/38320) Qamashi tumani hokimi, mutasaddi tashkilot rahbarlari, mahalla faollari, quruvchilar va nuroniylar ishtirok etdi. Tadbir davomida mazkur massiv nafaqat Qamashi tumani, balki butun viloyat aholisi uchun zamonaviy va farovon hayot sari muhim qadam ekani ta’kidlandi.
Qashqadaryo viloyati hokimligi
Axborot xizmati
Imomlar BAAda zamonaviy uslub va ilg‘or tajribalarni o‘rganmoqda
O‘zbekiston musulmonlari idorasi hamda Birlashgan Arab Amirliklari Islom ishlari va vaqflar bosh boshqarmasi hamkorligida o‘zbekistonlik imom-xatiblar uchun BAAda malaka oshirish o‘quvlari boshlandi. Bu haqda mazkur jarayonda ishtirok etayotgan Masjidlar bilan ishlash bo‘limi xabar berdi.
Mazkur o‘quv kurslarining asosiy maqsadi ikki qardosh mamlakat diniy soha vakillari o‘rtasida o‘zaro tajriba almashish, ilg‘or ma’rifiy yondashuvlar, zamonaviy ish usullari hamda dolzarb diniy-ijtimoiy masalalar yuzasidan fikr almashishdan iboratdir.
Safar doirasida bo‘lib o‘tgan navbatdagi ilmiy-amaliy mashg‘ulot davlatchilik asoslari, bag‘rikenglik madaniyati va zamonaviy diniy-ijtimoiy yondashuvlar mavzusiga bag‘ishlandi. Unda BAAning taraqqiyot yo‘li, qonun ustuvorligi va jamiyat barqarorligida «vasatiyya» (mo‘tadillik) tamoyilining o‘rni muhimligi ta’kidlandi. 200 dan ortiq millat va elat vakillari tinch-totuv istiqomat qilayotgan ushbu mamlakatda inson qadri va o‘zaro hurmat asosiy mezon ekaniga urg‘u berildi.
O‘z navbatida, BAA tomoni O‘zbekistonning boy sivilizatsiyasi va dunyo tamadduniga ulkan hissa qo‘shgan buyuk allomalarimiz merosini yuksak ehtirom bilan tilga oldi.
Malaka oshirish jarayonida ishtirokchilar masjidlar faoliyatini tashkil etish, jamiyatda ma’naviy muhitni mustahkamlash, xususan, ma’ruza va suhbatlarni zamonaviy axborot texnologiyalari — interaktiv taqdimotlar va proyektorlar orqali ko‘rgazmali yetkazish bo‘yicha ilg‘or amaliyotlar bilan yaqindan tanishmoqdalar.
Tadbir davomida BAA rahbariyatining global miqyosdagi insonparvarlik va xayriya tashabbuslari ham alohida e’tirof etilib, ikki tomonlama hamkorlikni rivojlantirish va diniy soha xodimlarining kasbiy salohiyatini oshirishga qaratilgan mazkur manfaatli safarni tashkil etgan mutasaddilarga samimiy minnatdorlik bildirildi.
O‘zbekiston musulmonlari idorasi
Matbuot xizmati
